Наградата Голема златна мимоза на 38. Филмски фестивал Херцег Нови – Црна Гора беше доделена на филмот „DJ Ахмет“ на режисерот Георги Унковски заради, како што беше соопштено синоќа на Кална кула, неговата способност да внесе нова виталност и емоција во наративата за одрастување.
Жирито во состав: Предраг Перишиќ – претседател, и членови: Есра Демиркиран, Маја Богојевиќ, Наташа Нинковиќ и Горчин Стојановиќ, го препознале филмот „DJ Ахмет“ заради “искреното истражување на првата љубов и товарот на традицијата, бидејќи носи приказна која е длабоко вкоренета во културата, а истовремено универзално одекнува. Главниот лик (15-годишниот Ахмет) вложува напори да ги помири традицијата и модерното, да ги исполни сновите на својот татко, но и своите лични снови“, се вели во одлуката на жирито. Филмот „DJ Ахмет“ веќе на почетокот на годината освои две награди на фестивалот за независен филм во Санденс: Специјална награда на жирито и Награда на публиката.
Филмот „DJ Ахмет“ ја освои Големата награда на 38. Филмски фестивал Херцег Нови
Златна мимоза за најдобра режија беше доделена на српскиот режисер Никола Лежаич заради, како што беше соопштено, врвната режија на филмот „Како овде така зелено?“.
„Секој кадар на филмот верно ги одразува личните искуства на режисерот. Филмот е длабоко вкоренет во неговиот живот и емоции, прикажувајќи и изговорени и неизговорени моменти со извонредна суптилност“, се вели во одлуката на жирито.
Златна мимоза за најдобар сценарио беше доделена на Стефан Бошковиќ за филмот „Видра“, заради “нежното и интелигентно прикажување на Ханин пат на одрастување, спојувајќи тага, првата љубов, љубомора и скриени напнатости во богата и интересна приказна која ја прикажува емоционалната сложеност на адолесценцијата“, се вели во образложението на жирито.
Златна мимоза за најдобра машка улога му припадна на Андрија Кузмановиќ за, како што беше соопштено, брилијантната улога во филмот „Yugo Florida“.
„Тој ја толкува сложената патека на Зоран, прикажувајќи ја и ранливоста и отпорноста. Неговото толкување на синот кој се соочува со семејните предизвици и личниот раст го прави филмот длабоко потресен“, беше соопштено синоќа на Кална кула.
Златна мимоза за најдобра женска улога беше доделена рамноправно – Ex Aequo – на Аницу Доброј и Леу Цок, за улогите Даде и Бронје во словенечкиот филм „Бело се пере на 90“.
„Тие прикажуваат храброст, хумор и оптимизам со кои се соочуваат со болест и семејни предизвици. Нивните нијансирани изведби донесоа срце и автентичност во оваа дирлива приказна“, се вели во образложението.
Специјално признание на жирито доби филмот „15 и по“ на црногорскиот режисер Миša Обрадовиќ за, како што беше соопштено, креативниот и интроспективен пристап во раскажувањето. Филмот го следи Ника додека го менува објективот кон својот живот, нудејќи промислено и интересно истражување на неговото барање на слобода и изборите што го формираат.
Наградата „Живко Николиќ“ – за специјален придонес во филмскиот израз ја доби црногорскиот режисер Иван Салатиќ за филмот „Отопување на владарот“.
Плакета „Зоран Живковиќ“ – за најдобар филм беше доделена на филмот „Образ“ на режисерот Никола Вукчевиќ.
Наградата FEDEORA на жирито составено од: Стефан Добриу, Наташа Друбек-Мајер и Стојан Стамениќ беше доделена на словенечкиот филм „Добри девојки / Little Trouble Girls“ на режисерката Уршка Ѓукиќ.
Наградата за најдобар документарен филм му припадна на филмот „Вибрации од Газа“ на режисерката Рехаб Назал кој дава потресен увид во секојдневниот живот на глувонеми деца од Палестина, родени и израснати под опсада на Израел, преиспитувајќи дали нивното оштетување на слухот е последица од употребата на звучно оружје.
За најдобар студентски филм беше прогласен „Среќно, Сара“ на Академијата за сценски уметности при Универзитетот во Сараево, режисерка и сценарио: Исидора Ратковиќ, кој на автентичен начин зборува за проблемот на заминување на младите од Балканот.
