Новиот комплекс, кој ќе се вика Дизниленд Абу Даби, ќе стане седмото глобално одморалиште на овој американски гигант и ќе се наоѓа на островот Јас (Yas Island) – позната дестинација за забава и туризам во Обединетите Арапски Емирати.
„Дизни“ го објави ова непосредно пред објавувањето на извештајот за приходите од вториот квартал, истакнувајќи дека тематските паркови продолжуваат да остваруваат најголем оперативен приход, и покрај предизвиците на пазарот на стриминг.
Новиот Дизниленд во Абу Даби ќе биде развиен во соработка со локалната фирма „Мирал“, додека дизајнот, креативното водство и надзорот на работењето ќе бидат раководени од реномирани „Дизни имаџинерс“. Се очекува паркот да се отвори на почетокот на 2030-тите, а планот вклучува тематски парк и хотелски комплекс.
Според Џош Д’Амаро, претседател на „Дизни Експериментс“, паркот нема да биде копија на постојните, туку ќе биде адаптиран на културата и вкусот на регионот, вклучувајќи ја автентичната архитектура и гастрономија.
Абу Даби и Дубаи сакаат да станат големи светски центри со летови што ќе поврзуваат една третина од светското население во рок од четири часа. Ова ги вклучува повеќе од 1,4 милијарди жители на Индија, кои сега ќе можат полесно да посетат парк на Дизни од оние во Шангај и Хонг Конг.
Д’Амаро истакнува дека дури 500 милиони луѓе во регионот имаат капацитет да го посетат овој парк, и дека пристапноста и брзорастечката инфраструктура биле клучните причини за доаѓањето на Дизни на Блискиот Исток, објавува Телеграф.
