На 27 март, на Светскиот ден на театарот, на големата сцена на Македонскиот народен театар премиерно ќе биде изведена танцовата претстава „Диво месо“, современа сценска адаптација на едно од најзначајните драмски дела на Горан Стефановски. Претставата почнува во 20 часот и носи поинакво читање на текстот, во кое телото станува главен носител на драмата.
Режијата и концептот се на Борче Начев, а кореографијата ја потпишуваат Александра Кочовска-Начева и Елена Антонова-Петровиќ. Музиката е на Албин Сопа, кој создава звучен пејзаж што го следи емотивниот ритам на сценската приказна.
Во оваа постановка, „Диво месо“ прераснува во танцово-музичко дело во кое текстот не се кажува само со зборови, туку се пренесува преку движење, физичка напнатост и телесна експресија. Претставата отвора простор за прашања што остануваат болно актуелни: како човекот се соочува со стравот, сиромаштијата и моралната ерозија, и дали човечноста може да опстане кога светот околу него се распаѓа.
Ова сценско читање не зборува само за едно минато време, туку и за секоја криза што го оттурнува човекот до границите на издржливоста. Преку современ танц, физички театар и редуциран текстуален израз, сцената се претвора во жив простор на преживување, отпор и сведочење. Телото овде е истовремено ранливо и силно, лично и општествено, претворајќи се во огледало на времето во кое живееме.
Премиерата е ко-продукциски проект реализиран во соработка меѓу МНТ, АРТ КУЛТ-УРА! и со поддршка од Министерството за култура и туризам. Со оваа изведба, националниот театар уште еднаш го потврдува својот интерес за современи, храбри и ангажирани сценски јазици.
Билетите се достапни онлајн преку веб-страницата на МНТ, како и на билетарницата на театарот.
