Европскиот финансиски сектор е премногу зависен од ИТ-услуги од компании надвор од Европа, што ја зголемува неговата изложеност на сајбер напади и „системски нарушувања“, предупредуваат регулаторите.
Холандската централна банка (De Nederlandsche Bank – DNB) и холандскиот регулатор за финансиски пазари (AFM) предупредуваат дека Европа треба да изгради сопствена инфраструктура за дигитални услуги за да го намали ризикот од напади или прекин во работењето на еден доминантен давател.
Регулаторите изразуваат загриженост дека било кој државен чинител може да ги искористи овие дигитални зависиности за политичка предност или да ги претвори во оружје во трговски спорови, со оглед на влошената геополитичка клима по инвазијата на Украина.
Зголемената зависност од неколку глобални ИТ-компании, особено американски, во областа на складирањето податоци, софтверот и вештачката интелигенција, ја намалува дигиталната автономија на Европа и го зголемува ризикот од сајбер-закани.
Во заеднички извештај, DNB и AFM нагласуваат дека се потребни „робусни европски алтернативи“ за заштита на европските податоци и институции од саботажа или нарушување на ИТ услугите, бидејќи во спротивност секторот останува изложен на геополитички ризици.
