Самостојниот синдикат на новинари и медиумски работници (ССНМ) оцени дека дигиталниот напад врз профилите на „Слободен печат“ на социјалната мрежа Инстаграм претставува напад врз слободата на медиумите и правото на информирање.
Според ССНМ, станува збор за организирани и злонамерни активности – предизвикани од масовни пријавувања и координирани напади кои имаат за цел да го нарушат нормалното функционирање на редакцијата и да вршат притисок на медиумот, иако редакцијата не ги прекршила правилата на платформата.
ССНМ оценува дека ваквите напади, кои се повторуваат циклично, го загрозуваат не само правото на слободно изразување, туку и безбедноста на онлајн просторот за медиумите, што бара итен одговор од надлежните институции. Синдикатот апелира Основното јавно обвинителство и Министерството за внатрешни работи да преземат сите потребни мерки за заштита на медиумите како глас на јавноста и совест на општеството.
Од ССНМ изразуваат надеж дека „Слободен печат“, како еден од водечките медиуми во земјава, ќе продолжи со своето одговорно професионално информирање и покрај предизвиците и обидите за дигитално замолчување.
