Во новата судска пријава, адвокатите на раперот Шон Комбс, познат и како Паф Диди, предлагаат нивниот клиент да биде ослободен со кауција од 50 милиони долари, како и да подлежи на континуирано високобезбедно следење и речиси целосни ограничувања за контакт, освен со неговите адвокати.
Износот на кауцијата останува на 50 милиони долари, како и во првите два предлози. Судиите претходно ги одбија двете барања за кауција на Комбс по неговото апсење во септември под обвинение за рекет и трговија со луѓе.
Тој се изјасни за невин по обвиненијата дека со години сексуално злоставувал жени со помош на мрежа на соработници и вработени, притоа замолчувајќи ги жртвите со уцени и насилство, вклучително и киднапирање, палење и тепање.
Комбс е задржан во федералниот затвор во Бруклин во очекување на судењето на 5 мај.
На 28 октомври, против него беа поднесени две нови обвиненија во Врховниот суд на државата Њујорк за дрогирање и сексуален напад на 10-годишно момче во хотелска соба во Њујорк во 2005 година и за слични напади врз 17-годишник во 2008 година.
Двете нови тужби се најнови во низата тужби поднесени против Комбс за сексуален напад на забави и состаноци во последните две децении, објави АП.
