Девојче од Босна прави традиционални балкански носии со шамии и украсни престилки за барбики, надевајќи се дека ќе создаде интерес за нејзината фолклорна Барбика додека новиот филм „Барби“ ги освојува обожавателите ширум светот.
Единаесетгодишната Есма Гљива од Сараево го започнала својот проект пред повеќе од еден месец откако видела неквалитетни фигури во продавница за сувенири. Барбиките кои се продавале не можеле да се движат и нивната облека била залепена на нив.
„Тоа беа некои пластични кукли облечени во фолклорни носии, тие не беа ни вистински кукли, … тие воопшто не беа соодветно облечени“, изјави Есма за Ројтерс прикажувајќи ги новите кукли од нејзината колекција. Се обидов да го направам тоа на подобар начин и мислам дека успеав“, рече таа.
Есма допрва треба да го гледа филмот за Барби, но нејзините пријатели и семејството велат дека таа го отелотворува духот на женската независност и претприемништво што доминира во филмот.
Израсната во семејство на фолклорни танчери аматери, Есма научила многу за мултирелигиозните традиции на Босна и самата е член на локална фолклорна група.
Таа е многу прецизна кога прави кукли облечени во традиционални муслимански, христијански православни и католички носии, а се грижи и за нивните фризури и минијатурен накит.
Таа вели дека би ги именувала своите кукли „Босански Барби кукли“, а исто така планира костими за босанскиот фолклорен Кен.
Есма секојдневно добива нарачки за своите кукли, а ги праќала во Бугарија, Чешка, Туркменистан, Норвешка, Британија и други земји.
„Толку сме горди што таа со таква посветеност го прифати овој проект и својот летен одмор го посвети на тоа“, рече мајката на Есма, Адана Гљива.
Извор: Reuters
