Растот на AfD повторно ја отвори дебатата внатре во христијанско-демократската унија околу тоа дали треба да се задржи принципиелната политика на строго одбивање на соработка со екстремно десничарската партија.
Претседателот на CDU и актуелен германски канцелар Фридрих Мерц јасно порача дека „нема соработка со партија која го негира сè она што ја направи Германија силна во последните децении“.
„Меѓу CDU и AfD нема заеднички точки – постојат фундаментални разлики“, изјави Мерц на собир во западна Германија, нагласувајќи дека AfD е против Европската унија, против еврото, против НАТО и против демократските вредности на кои е изградена модерна Германија.
AfD бележи особено висока поддршка во источните покраини, каде што на анкетите достигнува и над 40% – особено во Мекленбург-Западно Померание и Саксонија-Анхалт.
Некои поранешни функционери на CDU и дел од локалните претставници на истокот јавно се запрашаа дали тактиката на изолација, позната како „противпожарен ѕид“, сè уште има смисла пред изборите за покраински парламенти следната година.
Во интервју за Frankfurter Allgemeine Zeitung, Мерц изјави дека AfD ќе биде главниот политички противник на изборите во 2026 година.
Тој додаде дека Унијата ќе ги нагласи разликите со десничарите, особено во контекст на миграциската политика – област во која владата веќе воведе строги мерки за ограничување на нередовната миграција, што доведе до пад на бројот на барања за азил.
На иницијатива на CDU/CSU, неодамна беше укината и можноста за забрзано добивање германско државјанство, воведена во време на поранешниот канцелар Олаф Шолц. Унијата верува дека со тоа ќе им ги одземе аргументите на AfD, чија политика во голема мера се темели на антиимиграциски пораки и нетрпеливост кон странците.
Според аналитичарите, успехот на AfD е последица на растечкото незадоволство во источна Германија, економската несигурност и чувството дека традиционалните партии не ги слушаат грижите на граѓаните.
Извор: Index.hr
