На 3 февруари 1959 година светот на рокенролот беше погоден од трагедија што засекогаш ќе остане запишана во музичката историја како „денот кога музиката замолкна“. Во авионска несреќа во близина на Клир Лејк, Ајова, загинаа тројца млади музичари: Бади Коли, Ричи Валенс и Биг Бопер, како и пилотот Роџер Питерсон.
Несреќата се случила за време на турнејата „Winter Dance Party“, која започнала на 23 јануари 1959 година и опфаќала 24 настапи во 24 дена низ американскиот Среден Запад. Долгите патувања со незагреани автобуси довеле до исцрпеност и здравствени проблеми меѓу изведувачите.
По настапот во „Surf Ballroom“ во Клир Лејк, Бади Холи одлучил да изнајми мал авион за да избегне уште едно напорно патување до следната дестинација во Минесота. Првично, местата биле наменети за него и неговите музичари, но поради болест и случајни околности, во авионот влегле Ричи Валенс и Биг Бопер.
Авионот полетал во раните утрински часови на 3 февруари. Кратко по полетувањето, во лоши временски услови, леталото се урнало во поле со пченка. Сите патници загинале на лице место. Истрагата подоцна утврдила дека причините биле комбинација од неповолни временски услови и пилотска грешка.
Трагедијата оставила длабока трага во американската култура. Дванаесет години подоцна, во 1971 година, Дон Меклин ја објави песната American Pie, во која овој настан го опиша како „the day the music died“ – денот кога музиката умрела.
Но „American Pie“ не е само песна за несреќата. Во сложени и симболични стихови, Меклин ги опфаќа општествените и културните промени од 1950-тите и 1960-тите години, алудирајќи на атентатот врз Џон Ф. Кенеди, војната во Виетнам, контракултурата и трансформацијата на рокенролот. Песната често се толкува како приказна за „губењето на невиноста на Америка“.
Со децении, Меклин одбиваше детално да го објасни текстот, оставајќи простор за различни интерпретации. Токму таа мистерија, заедно со историската тежина на настанот од 1959 година, ја направи „American Pie“ една од највлијателните и најанализираните песни во поп и рок историјата.
