Вилнев, кој претходно режираше хитови како Blade Runner 2049, Arrival и двете филмски адаптации на „Дина“, изјави дека за него Џејмс Бонд е „света територија“ и дека со нетрпение очекува да ја раскаже новата приказна за најпознатиот британски таен агент.
„Растев гледајќи Бонд-филмови со татко ми – сè почнувајќи од Dr. No со Шон Конери“, рече Вилнев. „Јас сум вистински обожавател на Бонд.“
Во новиот проект ќе соработува со својата сопруга, канадската продуцентка Тања Лапоант, која ќе биде извршен продуцент.
Сепак, обожавателите ќе треба да почекаат – Вилнев прво ќе го заврши Dune: Messiah, третото продолжение од неговата адаптација на романите на Френк Херберт, чија премиера се очекува во декември 2026 година.
Голема промена во Бонд-вселена
Amazon MGM ја презеде креативната контрола врз франшизата од долгогодишните продуценти Барбара Броколи и Мајкл Г. Вилсон во февруари 2025 година, што значи дека назначувањето на Вилнев е најголемата промена досега под новото раководство.
Изборот на Вилнев наиде на позитивен прием од фановите. Британскиот James Bond International Fan Club напиша:
„Овој избор ќе ги воодушеви Бонд-фановите ширум светот. Добредојде назад, г-дин Бонд. Те очекувавме.“
Кој ќе биде новиот Џејмс Бонд?
Иако режисерот е познат, се уште не е објавено кој ќе го наследи Даниел Крег во улогата на тајниот агент. Спекулациите се разгорени – фановите онлајн, вклучително и основачот на Amazon, Џеф Безос, се вклучија во играта на претпоставки. Меѓу фаворитите се спомнуваат Хенри Кавил, Арон Тејлор-Џонсон и Арон Пјер.
Продуцентите Ејми Паскал (Challengers, Spider-Man) и Дејвид Хејман (Harry Potter, Paddington) ќе соработуваат со Вилнев, истакнувајќи:
„Имаме среќа што сме во рацете на ваков исклучителен режисер.“
Големи очекувања и уште поголема одговорност
Секој нов филм за Бонд се соочува со споредби со класиците од минатото, почнувајќи од 1960-тите. Вилнев е свесен за тежината на таа традиција:
„Ова е огромна одговорност, но исто така и неверојатна возбуда и чест.“
Со Вилнев зад камерата и нов тим пред него, следниот филм за Бонд ветува свеж пристап – но со почит кон сè што франшизата значи повеќе од 60 години.
Извор: NPR
