Четвртиот фестивалски ден на седмото издание на фестивалот на филм и музика SИРНИ носи клучни моменти: прогласување на победниците, свечено доделување на награди и посветена проекција на значаен документарен филм.
Поради нестабилните временски услови, целата програма денеска се сели во просторот КОТУР, каде ќе се одржи завршниот дел од филмската селекција.
Во 19:30 часот започнува церемонијата на доделување на наградите во официјалната и студентската селекција. Годинашното стручно жири, кое ги оценува филмовите, е составено од актерката Кристина Леловац, режисерот Трифун Ситниковски и режисерката Дина Дума.
Награди и селекции
Официјалната селекција се натпреварува за наградата „Данчо Чеврески“, финансиски поддржана од Халк Банка. Студентската селекција се бори за признанието најдобар студентски филм, a целата филмска програма конкурира и за награда од публиката.
Вечерна проекција во соработка со МакеДокс
По доделувањето на наградите, од 20:00 часот, ќе се прикаже документарниот филм „Бабички на револуцијата“ (2006), во режија на Петра Селишкар и Бранд Ферро, во соработка со МакеДокс. Проекцијата е посветена на Илинденка Петрушева.
Филмот е интимна, но моќна приказна за два пара и нивните семејства кои го преживеале периодот на Втората светска војна, со приказни од Словенија, Македонија и Куба. Делото комбинира емоционални и комични елементи и разгледува три различни идеологии преку лични сведоштва.
Музичка селекција
Паралелно со филмската проекција, ќе настапи Давид Николовски (DaPhunk) со ексклузивна музичка селекција.
Фестивалот SИРНИ продолжува со активна програма до 6 октомври, со сите настани во Кафе и филм КОТУР. Целосниот распоред е достапен на веб-страницата на фестивалот и на социјалните мрежи.
Влезот е бесплатен, но поради ограничениот број на седишта, потребно е предвремено да подигнете билет од КОТУР.
