Организацијата Факултет за работи што не се учат – ФРУ, Скопје, во соработка со мрежата „Награди за млади визуелни уметници“ (YVAA), резиденциската програма Residency Unlimited (RU), Њујорк, и фондацијата Trust for Mutual Understanding, Њујорк, по осумнаесетти пат го организира процесот за доделување на наградата „ДЕНЕС “за млад/а визуел(е)н/а уметни(к)чка во Северна Македонија до 35 години.
Доделувањето на наградата „ДЕНЕС“ во 2024 година ќе се одржи во Национална галерија на Република Северна Македонија – мултимедијален центар „Мала станица“ во Скопје.
Програмата е следна:
19 ноември (вторник)
12 часот – Претставување на тројцата уметници – финалисти МАРКО ГУТИЌ МИЖИМАКОВ, ЈОВАН ЈОСИФОВСКИ, ИВАНА САМАНДОВА и разговор со жирито;
20 часот – Изложба на тројцата уметници – финалисти МАРКО ГУТИЌ МИЖИМАКОВ, ЈОВАН ЈОСИФОВСКИ, ИВАНА САМАНДОВА и доделување на наградите.
Наградата „ДЕНЕС“ се доделува на годишно ниво за исклучителна и истакната тековна уметничка практика која подразбира критичко и естетско размислување и дејствување, и е единствена награда од овој вид за млад/а визуел(е)н/а уметни(к)чка во земјава. Оваа значајна и независна награда, покрај двомесечната програма за престој на уметници во Њујорк, од минатата година во која го одбележа и своето 20-годишно постоење, вклучува и други новини и резиденции. „ДЕНЕС“, исто така, овозможува и уникатно искуство на уметниците да бидат дел од специјално наменет едукативен процес во визуелната уметност насловен „Совршениот уметник“, да имаат средби и презентации со интернационално жири и да продуцираат дело, во рамки на изложба како финалисти на наградата.
По одбележувањето на 20 години „ДЕНЕС“ во 2023 година, структурата на наградата доби поинаков формат, т.е. се обидува да обезбеди повеќе можности за самите финалисти, продуцирајќи ја наградата колаборативно и понекомпетитивно. Па така, добитникот/добитничката на наградата „ДЕНЕС“- 2024 добива двомесечен престој во Residency Unlimited во Њујорк во периодот август-септември 2025 година, додека останатите двајца уметници – финалисти добиваат едномесечен престој во Галеријата „Простор“ на организацијата „Културен хаб Хрватска“ во Сплит во мај 2025 година и самостојна изложба во просторот или самостојна изложба во Скопје во 2025 година.
Жирито за XVIII награда „ДЕНЕС“ 2024 е составено од: Ксенија Нурил, историчарка на уметност и кураторка, директорка на галеријата на реномираното уметничко училиште Art Students League од Њујорк, САД, Сања Анѓелковиќ, аудиовизуелна уметничка со седиште меѓу Нови Сад и Виена, добитничка на наградата Димитрије Башичевиќ Мангелос (YVAA, Белград, Србија во 2023 година, и Ана Франговска, историчарка на уметност и кураторка, виш кустос во Националната галерија на Република Северна Македонија и претседателка на АИКА – Македонија.
Наградата ДЕНЕС е основана во 2002 година како годишна награда за најдобар млад ликовен уметник до 35 години во земјава од страна на Центарот за современи уметности – Скопје во соработка со Фондацијата за граѓанско општество од Њујорк, САД, но официјално првпат беше доделена во 2003 година. Намерата на наградата ДЕНЕС е да им понуди повеќе можности на младите уметници да ги совладаат своите уметнички интереси и да ги прикажат пред пошироката публика, како и да се продлабочат дискусиите помеѓу институциите и младите уметници. Од 2015 година наградата локално ја организира здружението Факултет за работи што не се учат – ФРУ, во рамки на фестивалот АКТО.
Досегашни добитници на наградата ДЕНЕС се: Ѓорѓи Десподов/ Клелија Живковиќ/ Бурџу Мусли, Ивана Мирчевска, Елена Чемерска, Верица Ковачевска, Зорица Зафировска, Иван Ивановски, Филип Јовановски, Велимир Жерновски, Илија Прокопиев, Кристина Божурска, Ѓорѓе Јовановиќ, Ана Ивановска, Борис Петровски, Атанас Ботев, Далибор Тренчевски, ОПА (Опсесивна посесивна агресија) и Славица Јанешлиева.
