Американскиот пратеник при НАТО изјави дека денеска очекува „големи“ ветувања од сојузниците за финансирање на набавката на оружје за Украина, кое би помогнало во одбраната од руските воздушни напади, пренесува Bloomberg.
Европа ја финансира набавката на оружје
Според специјалната програма за набавка наречена PURL, Украина може да купува оружје од САД со средства што главно ги обезбедуваат европските партнери.
„PURL сега функционира мазно и ефикасно“, изјави американскиот амбасадор при НАТО, Метју Витакер, пред новинарите синоќа. Тој додаде: „Во овој момент очекуваме нашите европски сојузници да продолжат со набавките, а како што реков, утре очекувам неколку големи најави.“
Зеленски: Некои сојузници се двоумат
Украинскиот претседател Володимир Зеленски неодамна изјави дека некои сојузници се двоумат околу обезбедување финансии за набавка на оружје. До септември, Киев успеал да собере околу 2 милијарди долари помош од шест држави — значително под целта, додека Русија ги засилува нападите врз енергетската инфраструктура и цивилни цели.
Пад на воената помош и зголемен притисок врз Европа
Изјавата на Витакер доаѓа по извештајот на Институтот Кил, кој објави дека воената помош за Украина во јули и август нагло опаднала. Просечниот месечен износ бил за 43% понизок во споредба со првата половина на годината.
На денешниот состанок на министрите за одбрана на НАТО во Брисел ќе присуствува и американскиот министер за одбрана Пит Хегсет, кој потоа ќе се приклучи на средбата на т.н. Контакт група за одбрана на Украина – група која ја координира испораката на оружје на Киев од почетокот на руската инвазија.
Зеленски во петок во Белата куќа
Претседателот Зеленски во петок ќе се сретне со американскиот претседател Доналд Трамп во Белата куќа, каде што ќе разговараат за воздушната одбрана и набавката на оружје со долг дострел.
Новата финансиска шема го префрли товарот на финансирање на украинските воени и економски потреби врз Европа. Но, неколку земји членки на ЕУ се соочуваат со политички и буџетски предизвици, додека се обидуваат паралелно да ги зголемат и сопствените инвестиции во безбедноста.
„Време е нашите сојузници во НАТО да преземат одговорност и навистина да ја операционализираат својата посветеност кон Украина и нејзината одбрана, за да создадеме услови за постигнување мировен договор“, изјави Витакер, пренесува Bloomberg.
