Русија денес соопшти дека извршила голема воена вежба во која било вклучено и нуклеарно оружје, еден ден откако САД објавија одложување на плановите за втор самит меѓу претседателите Владимир Путин и Доналд Трамп.
Кремљ објави видео од началникот на Генералштабот, генерал Валериј Герасимов, како го информира Путин за вежбите. Меѓу активностите беа и лансирањата на интерконтинентални балистички ракети способни да стигнат до САД.
Предупредување до Киев и сојузниците
За време на војната во Украина, Путин често укажуваше на нуклеарната моќ на Русија како предупредување до Киев и западните сојузници на Украина. НАТО, исто така, спроведува вежби за нуклеарно одвраќање овој месец.
Путин и Трамп разговараа минатата недела и се согласија да одржат самит во Унгарија, за кој Кремљ рече дека би можел да се одржи во рок од неколку недели.
Но, по телефонскиот разговор меѓу врвните дипломати на двете земји во понеделник, Белата куќа следниот ден објави дека Трамп нема планови да се сретне со Путин „во блиска иднина“. Трамп рече дека не сака да одржи залудна средба и тврди дека Москва сака да ја избегне истата.
Русите тврдат дека подготовките продолжуваат
Сепак, руските претставници изјавија дека подготовките за самитот продолжуваат во секој случај.
„Датумите сè уште не се одредени, но пред тоа е потребна темелна подготовка, што одзема време“, изјави портпаролот на Кремљ, Дмитриј Песков, пред новинарите.
Состанокот беше одложен откако Русија им ги повтори на САД своите претходни услови за постигнување мировен договор, вклучително и Украина да ја отстапи контролата врз целиот Донбас, регион на југоистокот на земјата, изјавија три извори за Ројтерс.
Една од причините за одложувањето е несогласувањето со изјавата на Трамп од минатата недела дека двете страни треба да застанат на сегашните бојни линии.
