Документот минатиот месец бил доставен до Одборот за надзор на Претставничкиот дом од страна на адвокатите на оставнината на Епстајн, откако одборот издаде судски повик. Демократските членови на одборот сега ја објавија копијата од наводната честитка на платформата Икс.
На белешката со рака стои напишана порака: „Среќен роденден – и нека секој ден биде уште една прекрасна тајна.“
Белата куќа: „Тоа не е потписот на Трамп“
Веднаш по објавата, Белата куќа ја негираше автентичноста на документот. „Претседателот Трамп не ја нацртал оваа слика, ниту пак ја потпишал“, изјави портпаролката Каролин Левит. „Правниот тим на претседателот Трамп ќе продолжи агресивно да ги води постапките.“
Трамп уште во јули, кога Wall Street Journal првпат објави детали за наводната честитка, рече дека станува збор за „лажна работа“. „Тоа не се мои зборови, јас не зборувам така. Покрај тоа, не цртам слики“, изјави тогаш.
Трамп поднесе тужба против WSJ
Претседателот Трамп поднесе тужба против новинарите, издавачот и раководството на Wall Street Journal, вклучително и сопственикот на News Corp, Руперт Мардок, поради објавената приказна.
Издавачот Dow Jones возврати дека има „целосна доверба во ригорозноста и точноста на своето известување“.
Заменик-шефот на кабинетот на Трамп, Тејлор Будович, во понеделникот на Икс објави повеќе фотографии од претседателските потписи и порача: „Време е @newscorp да ја отвори чековната книшка, тоа не е негов потпис. КЛЕВЕТА!“
Контекст: пријателството и разделбата
Според пишувањето на Wall Street Journal, роденденската книга за Епстајн во 2003 година ја составила неговата блиска соработничка Гислејн Максвел. Во неа имало пораки од разни познаници на Епстајн, меѓу кои и онаа што наводно го носи името на Трамп.
Трамп и Епстајн со години биле во пријателски односи, но претседателот тврди дека се скарале на почетокот на 2000-тите откако Епстајн „му презел вработени“ од неговиот ресорт „Мар-а-Лаго“ на Флорида.
Епстајн првпат беше обвинет во 2006 година на Флорида за подведување проституција, а во 2019 година почина во затвор додека чекаше судење за трговија со малолетни лица.
Извор: Index.hr
