Според податоците на Централниот одбор за контрола на загадувањето, нивото на ситни честички PM2.5 во воздухот во средата достигнало 438 микрограми на кубен метар – што е 30 пати повеќе од безбедната граница утврдена од Светската здравствена организација (СЗО) и осум пати повисоко од индискиот национален просек.
Властите ја прогласија состојбата за „многу тешка“, предупредувајќи дека загадувањето може да предизвика здравствени последици и кај здравите лица, а сериозно да ги загрози оние со хронични заболувања.
Лекарите апелираат граѓаните, особено децата и повозрасните лица, да избегнуваат излегување на отворено и да носат заштитни маски при неопходно движење.
Меѓу мерките што се спроведуваат се и ограничување на движењето на товарни возила, забрана за минирање и дробење камен, како и користење на таканаречени „смог-пушки“ – машини кои распрскуваат вода за да се намали прашината и загадувањето во воздухот.
Загадениот воздух е повторувачки проблем во Делхи, особено во зимскиот период. Комбинацијата од слаби ветрови, ниски температури, издувни гасови, индустриски емисии и палење на стрништа во соседните држави создава густ слој смог што ја прекрива метрополата.
Во тек е третата фаза од Планот за итен одговор на загадување (GRAP), кој се активира кога концентрациите достигнуваат критични нивоа.
Состојбата предизвика и јавни протести и политички обвинувања. Опозициската Аам Адми партија (AAP) ја обвини владата на Делхи дека ги „манипулира“ податоците за квалитетот на воздухот и не ги штити граѓаните, барајќи прогласување вонредна состојба поради јавно здравје.
Од друга страна, властите тврдат дека работат со полна сериозност и одговорност за справување со кризата. Министерот за животна средина Манџиндер Сингх Сирса изјави дека податоците за загадувањето се јавни и дека прскањето со вода околу мерните станици е мерка за намалување на прашината, а не за прикривање на вистинските бројки.
Извор: BBC
