Во понеделникот вечерта, во близина на Црвената тврдина во Њу Делхи, се случи силна експлозија во автомобил при што загинаа најмалку 13 лица, а повеќе од дваесет беа повредени. Индиските власти потврдија дека случајот се води како терористички напад, а полицијата ја активираше законската рамка за борба против тероризмот.
Според изјавата на комесарот на полицијата во Делхи, Сатиш Голча, експлозијата потекнала од возило во движење – Hyundai i20, кое запрело на семафор во старото градско подрачје.
На местото на несреќата пристигнале специјалните единици, противпожарните служби и форензичари, додека властите го блокираа поширокиот периметар околу историскиот комплекс на Могулската ера, заштитен од UNESCO.
Полицијата во Делхи соопшти дека експлозијата е поврзана со разоткриен „транснационален терористички модул“, откриен само неколку часа претходно во индустрискиот град Фаридабад, околу 30 километри од престолнината.
Во координација со полициските служби од индиската држава Харјана, биле запленети големи количини експлозивен материјал, а уапсени се две лица – лекари од Кашмир и Сахаранпур, осомничени за врски со Џаиш-е-Мохамед, вооружена група со седиште во Пакистан.
Локалните медиуми јавуваат дека автомобилот кој експлодирал бил поврзан со еден од осомничените. Првичната истрага покажала дека возилото неколкупати било препродавано, а полицијата го привела оригиналниот сопственик, како и последниот купувач.
Властите официјално го активираа Законот за превенција на незаконски активности (UAPA), со што случајот доби статус на терористички акт. Индијското Министерство за внатрешни работи потврди дека истрагата ќе ја водат Националната истражна агенција (NIA) и антитерористичките оддели на полицијата.
Премиерот Нарендра Моди изрази сочувство до семејствата на жртвите и најави дека државата „нема да толерира обиди за нарушување на безбедноста на престолнината“.
Црвената тврдина, изградена во 17 век за време на владеењето на Могулите, е еден од најпрепознатливите национални симболи на Индија. Нападот во нејзина близина има длабока симболична тежина, потсетувајќи на претходните инциденти кога историски локации биле мета на екстремистички групи.
