Здравствените експерти предупредуваат дека дехидратацијата во зимските месеци често се потценува, што може да доведе до замор, намалена концентрација, сува кожа и посериозни здравствени проблеми, вклучително и нарушувања на функцијата на бубрезите.
Иако студеното време ретко го поврзуваме со дехидратација, одржувањето на соодветна хидратација во зима е исто толку важно, а понекогаш и поважно отколку во лето.
Зошто хидратацијата е клучна и во зима?
Клиничката докторка и професорка по семејна медицина на Универзитетот „Пурдју“, Џадира Сантијаго Банјуелос, објаснува дека хидратацијата има директно влијание врз низа телесни функции – од здравјето на кожата, преку имунолошкиот систем, до подвижноста на зглобовите.
Хидратацијата има и значајна улога во заштитата од настинки и грип, бидејќи помага во одржување на влажноста на слузницата, која претставува природна бариера против вируси и бактерии.
Зошто зимската дехидратација лесно се игнорира?
Според Банјуелос, еден од главните проблеми е тоа што зимата не ја поврзуваме со чувство на жед, па ретко размислуваме дали внесуваме доволно вода.
Дополнително, научните податоци покажуваат дека рецепторите за жед во зима се намалуваат и до 40 проценти, што значи дека телото може да биде дехидрирано уште пред да почувствуваме жед.
Студениот и сув воздух дополнително ја извлекува влагата од телото, а иако зноиме помалку забележливо, губењето течности продолжува, само што е потешко да се препознае.
Дехидратацијата може да има различни последици, во зависност од тоа колку долго и колку сериозно телото е лишено од доволно течности. Во полесни и умерени случаи, таа најчесто се манифестира преку вртоглавица, сува и чувствителна кожа, испукани усни, чувство на општа слабост и замор, како и тешкотии со концентрацијата, состојба што многумина ја опишуваат како „ментална магла“.
Доколку ваквата состојба трае подолго, ризиците стануваат значително посериозни. Продолжената дехидратација може да ја наруши работата на бубрезите, да го зголеми ризикот од појава на камења во бубрезите и да доведе до општ пад на имунитетот, што го прави организмот поподложен на инфекции и заболувања, особено во зимскиот период.
Колку вода навистина ни е потребна?
Иако често се споменува препораката за внесување осум чаши вода дневно, експертите нагласуваат дека ова правило не е универзално и не одговара на сите. Потребите за течности зависат од полот, возраста, физичката активност и условите во кои престојува лицето. Според докторката Џадира Сантијаго Банјуелос, мажите во просек имаат потреба од околу 13 чаши вода дневно, што изнесува приближно три литри, додека кај жените потребната количина е околу 9 чаши, односно околу два литри дневно. Овие потреби можат дополнително да се зголемат кај бремени жени, доилки, лица кои се физички поактивни или кај оние кои поголем дел од денот го поминуваат во суви и силно загреани простории.
