Кинески AI стартап DeepSeek го забрзува развојот на својот напреден модел – следната генерација под ознака R2, кој треба да го наследи јануарскиот R1 модел. Според информации блиски на компанијата, почетниот план беше моделот да биде објавен почетокот на мај, но сега се планира лансирање што е можно поскоро. Се очекува дека новиот модел ќе донесе подобрувања во програмирањето и ќе ја прошири способноста за расудување на повеќе јазици освен англискиот.
DeepSeek стана познат по тоа што со својот поевтин AI модел предизвика голем удар на глобалните берзи, намалувајќи ја вредноста на технолошките гиганти за над еден билион долари. Неговиот R1 модел е конкурентен, иако користи послаби Nvidia процесори во споредба со моделите што се развивани со инвестиции од стотици милијарди долари од најголемите американски компании.
Американската влада внимателно ја следи ситуацијата, бидејќи развојот на вештачката интелигенција стана национален приоритет. DeepSeek е веќе интегриран во производите на бројни кинески компании, додека властите во Пекинг сè повеќе се потпираат на неговите модели.
Иако компанијата е релативно непозната, нејзиниот основач, Лианг Венфенг, веќе стана милијардер.
Лианг претходно се спротивстави на трендот на вложувања во потрошувачки AI апликации, фокусирајќи се на подобрување на основните модели. Неговите компании нудат натпросечни плати за да привлекуваат врвни таленти, што е овозможено со приходите од High-Flyer.
DeepSeek успеа да развие конкурентен AI модел благодарение на долгогодишните инвестиции во компјутерска моќ.
