Бандите на Хаити се виновни за широко распространети злосторства против деца, вклучително и силување и убиства, соопшти Амнести интернешенел.
Во новиот извештај кој е објавен денеска, невладината организација рече дека ескалацијата на насилството во земјата „не е ништо помалку од напад на самото детство“.
Безбедносната ситуација на Хаити значително се влоши по атентатот на претседателот Џовенел Моис во јули 2021 година. Бандите сега контролираат делови од земјата, вклучително и поголемиот дел од главниот град Порт-о-Пренс. Се смета дека повеќе од 1 милион деца живеат во области контролирани од банди.
Генералниот секретар на Амнести Интернешнл, Ањес Каламар ги обвини бандите за закани, тепање, силување и убивање деца.
„Животите на премногу деца на Хаити се уништени и тие немаат каде да одат за заштита или правда“, рече Каламар и додаде: „Тие се бркани и понекогаш убивани од групи за самоодбрана, додека властите самоволно ги приведуваат. Се краде детството“.
Како дел од истрагата на невладината организација, истражувачите интервјуираа 112 лица, вклучително и 51 дете и документираа случаи на 18 девојчиња кои биле сексуално злоупотребувани од членови на банда.
Според неодамнешниот извештај на УНИЦЕФ, од 2023 година, сексуалното насилство врз децата на Хаити е зголемено за 1000%.
Банди, исто така, регрутираа многу деца, искористувајќи го нивниот страв и нивната глад. Таквите деца потоа ризикуваат да бидат цел на групи за самоодбрана, за кои е познато дека убиле деца за кои се смета дека се поврзани со банди.
Амнести интернешнал ја повика владата на Хаити и меѓународните донатори да работат заедно на план за заштита на децата. Масовниот проток на оружје во Хаити, исто така, мора да биде запрен.
Во меѓувреме, повеќе од 5,5 милиони жители на Хаити имаат потреба од итна хуманитарна помош.
