Данскиот претставник и претседател на Комитетот за одбрана на данскиот парламент, Расмус Јарлов, во интервју за Си-Ен-Ен предупреди дека евентуалната американска воена интервенција во Гренланд би значела војна меѓу Данска и Соединетите Американски Држави.
Јарлов рече дека заканите од американскиот претседател Доналд Трамп, кој сè уште не ја исклучува можноста за употреба на сила за преземање на Гренланд, се сериозни и дека Данска би била неодговорна ако не ги сфати сериозно.
„Доколку имаше инвазија од страна на американските сили, тоа ќе беше војна и ние ќе се боревме едни против други“, рече Јарлов во интервју за Си-Ен-Ен, нагласувајќи дека Данска има обврска да ја брани својата територија, население и околу 57.000 граѓани што живеат на Гренланд.
„Ова не е Америка што ја знаеме“
Јарлов рече дека изјавите на Трамп веќе предизвикале сериозна штета на довербата во рамките на трансатлантската алијанса и дека ќе биде многу тешко да се вратат односите на претходното ниво.
„Шок е што САД се свртеа против нас толку брзо и толку агресивно. Опасно е за нас да бидеме толку зависни од Америка како и порано“, рече тој, додавајќи дека Данска сè уште сака да соработува со САД за да го спаси НАТО и да ја зачува безбедноста на Западот.
Тој предупреди дека Данска никогаш не може да се согласи со барање за предавање на територија и население кое не сака да биде дел од Соединетите Американски Држави.
„Ова не е Америка каква што ја знаеме. Ова не е земја што напаѓа мирни, пријателски соседи и води освојувачки војни“, рече Јарлов, истакнувајќи дека Гренланд ѝ припаѓал на Данска со векови и дека нема основа за американски територијални претензии.
