Според податоците на државниот институт за заразни болести, Statens Serum Institut (SSI), во периодот од 11 до 17 август се регистрирани 115 случаи на грип, во споредба со само 19 случаи претходната недела. Ова е првпат во последните 15 години на систематско следење да се евидентира масовна епидемија на грип во август.
„Вакво нешто е навистина многу невообичаено,“ изјави Рамона Требијен, раководителка на одделение во SSI.
Епидемијата е поврзана со Smukfest, фестивал кој се одржа во градот Скандерборг и собра речиси 60.000 посетители за една недела. Според SSI, заразените посетители покажале идентична форма на вирусот инфлуенца А H1N1, попознат како свински грип, што укажува на заедничко потекло на инфекцијата.
„Сè упатува дека изворот на епидемијата е Smukfest,“ потврди Требијен.
Иако повеќето заболени ќе се опорават за една недела, лекарите предупредуваат дека деца, бремени жени, постари лица и пациенти со хронични заболувања се изложени на поголем ризик од сериозни компликации.
Во последните денови бројот на нови случаи забележува опаѓање, но здравствените власти остануваат внимателни. SSI порача дека граѓаните и натаму можат да присуствуваат на фестивали и масовни настани, но „епизодата со Smukfest покажува дека тие можат да станат супер-ширачки настани доколку околностите тоа го дозволат“.
Извор: Euronews