Извештајот на DR, повикувајќи се на неименувани извори, наведува дека целта на операцијата била инфилтрација во гренландското општество со крајна намера – промовирање на независност и можен анекс кон САД. Не е разјаснето кој точно стои зад активностите, но данската разузнавачка служба PET предупредува дека Гренланд е цел на повеќе влијателни кампањи.
„Секој обид за мешање во внатрешните работи на Кралството Данска е апсолутно неприфатлив,“ изјави Расмусен, додавајќи дека американскиот дипломат Марк Стро, кој е највисок претставник на САД во Данска, е официјално повикан на разговор.
Интересот на САД за Гренланд не е нов. Поранешниот (и сегашен) претседател Доналд Трамп повеќе пати јавно изјавуваше дека сака да го анектира островот, а во една прилика дури и не ја исклучи можноста за преземање со сила. Потпретседателот Џеј Ди Ванс, пак, ја обвини Копенхаген дека недоволно инвестира во територијата, што ги потхрани шпекулациите за американски интереси во Гренланд.
Во мај, премиерката на Данска Мете Фредериксен, за време на посета на Гренланд, директно порача:
„Не можете да анектирате туѓа земја. Тоа не е како да купувате имот.“
Според проценките на данската безбедносна служба PET, потенцијалните влијателни кампањи можат да вклучуваат создавање раздор меѓу Гренланд и Данска, преку користење на постоечки или измислени несогласувања, или преку дезинформација и регрутација на „агенти на влијание“.
Во извештајот на DR се наведува дека еден американски државјанин неодамна ја посетил престолнината Нуук, при што се обидувал да направи список на Гренландци што би го поддржале американското влијание – со цел подоцна да бидат регрутирани во движење за отцепување.
Гренланд, иако автономна територија, е дел од Кралството Данска, и има стратешко значење поради својата географска положба, природните ресурси и арктичката важност. Има сопствено локално самоуправување, но надворешната политика и безбедност сè уште се во рацете на Копенхаген.
Покрај американскиот интерес, други меѓународни сили – вклучително и Кина и Русија – покажуваат зголемено внимание кон Арктикот, што ја засилува чувствителноста на регионот за мешање и геополитичка конкуренција.
Официјален Вашингтон сè уште нема коментар, а амбасадорот на САД во Данска не е назначен, што го прави Марк Стро највисокиот дипломатски претставник на терен.
Данската јавност, која традиционално ги смета САД за еден од најблиските сојузници, е видно потресена од последните случувања. Како што стојат работите, односите меѓу двете земји можат да се соочат со сериозен дипломатски предизвик.
Извор: BBC
