Иако критичарите ја оценија како катастрофална, гледачите на социјалните мрежи ја слават нејзината комбинација од „high camp“ стил, впечатлива мода и совршени ентериери.
Од своето деби во вторникот, серијата беше масовно осудена во медиумите. The Times ја нарече „можеби најлошата ТВ-драма во историјата“, додека The Guardian ја оцени како „фасцинантно, егзистенцијално лоша“, при што и двата медиуми ѝ доделија нула ѕвезди од можни пет. На платформата Rotten Tomatoes, All’s Fair моментално има ретка оценка од 0% — знак за универзално негативни критики.
Сепак, некои показатели упатуваат дека серијата би можела да стане хит, барем на интернет. Корисници на социјалната мрежа X ја опишуваат како „смешно апсурдна“ и „совршен вид на камперска глупост“, па дури и како серија што е „многу забавна затоа што не се плаши да биде лоша“. Токму оваа комбинација на ужасни критики и ѕвезден кастинг — Кардашијан во главната улога заедно со Глен Клоуз, Наоми Вотс, Ниси Неш-Бетс, Сара Полсон и Тијана Тејлор — ја направи серијата вистински феномен.
Во првите три епизоди има сцени кои веќе станаа вирални, меѓу кои и дијалог со вулгарен хумор меѓу ликовите на Клоуз и Полсон, што го претвори All’s Fair во симбол на телевизискиот „камп“. Приказната ја следи измислената адвокатска фирма Grant, Ronson and Green, која се специјализира за разводи на богати жени и е водена од трите партнерки — Кардашијан, Вотс и Неш-Бетс. Нивната главна ривалка е Полсон, во улога инспирирана од ликот на Алексис Карингтон од легендарната сапуница Dynasty.
Критичарите посочуваат дека актерската игра е нерамномерна: Клоуз се забавува, Полсон е претерана, а Кардашијан — речиси без емоции. Иако нејзината изведба делува „инертно“, некои сметаат дека тоа е токму дел од нејзиниот бренд — мешавина од луксуз и дистанца, препознатлива уште од реалните шоуа Keeping Up with the Kardashians и The Kardashians.
И покрај слабите оценки, All’s Fair можеби нема да биде потполно неуспешна. За Hulu, контроверзијата може да се претвори во предност: серијата нуди доволно материјал за „hate-watching“ и за мемови кои ја одржуваат во фокусот на јавноста.
Во пренатрупаниот свет на стриминг-понуди, каде што и добрите серии лесно се губат, All’s Fair би можела да се издвои токму затоа што е — забележително лоша. Како што вели и нејзиниот наслов, „во војната на стриминг-платформите — сè е дозволено“.
Извор: BBC
