Трошоците за храна можат сериозно да го оптоварат вашиот домашен буџет, но со малку планирање можно е значително да го намалите износот што го трошите во продавница, без да ја жртвувате квалитетната исхрана. Експертите истакнуваат дека дури и примената на неколку едноставни правила може да донесе големи заштеди на долг рок, а ако ги применувате доследно, разликата во вашиот паричник ќе биде повеќе од очигледна.
Замрзнатото е понекогаш подобро од свежото
Еден од наједноставните трикови е да избирате замрзнато овошје и зеленчук наместо свежо. Овие производи се замрзнуваат веднаш по бербата, па го задржуваат својот квалитет и нутритивна вредност, а истовремено се честопати поевтини. Дополнителна предност е што нема страв дека ќе се расипат пред да ги употребите.
Планирање на оброците и „Правилото 6:1“
Планирањето игра клучна улога. Ако однапред знаете што ќе готвите во текот на неделата, ќе купите само го она што ви е навистина потребно. Ова помага да се избегнат импулсивните купувања и го намалува фрлањето храна.
За оние кои не сакаат детален мени-план, експертите го препорачуваат правилото 6:1: 6 видови зеленчук, 5 видови овошје, 4 извори на протеини, 3 видови јаглехидрати, 2 видови сосови или намази и една „забавна“ намирница (грицки или слатко)
Совет плус: Пред да тргнете во продавница, направете „брза инспекција“ на фрижидерот и оставата за да не купите нешто што веќе го имате.
3. Јадете сезонски и посетете ги пазарите
Купувањето сезонска храна е најефикасниот начин да заштедите. Овошјето и зеленчукот кои се во сезона се поевтини, посвежи и повкусни бидејќи не бараат скап транспорт и увоз. Пазарите се одлична опција каде што производите доаѓаат директно од производителите, со што се избегнуваат посредниците и се поддржува локалната економија.
4. Искористете ги програмите за лојалност
Ако редовно купувате во исти маркети, задолжително користете картички и мобилни апликации за лојалност. Тие нудат попусти и поени кои на крајот на месецот можат значително да ја намалат вкупната сметка.
5. Внимателно со купувањето на големо
Купувањето на големо е исплатливо само ако сте сигурни дека ќе ја потрошите храната навреме. Големите пакувања изгледаат поевтино, но ако дел од храната заврши во ѓубре, вистинската заштеда исчезнува.
6. Избегнувајте ги „практичните“ производи
Готовите и однапред подготвени производи, како што се исечкано овошје или исчистен зеленчук во пластични пакувања, се многу поскапи токму поради нивната практичност. Иако ви штедат време, тие го зголемуваат трошокот на долг рок и често имаат пократок рок на траење.
7. Месото како луксуз, а не секојдневие
Месото е често најскапата ставка во кошничката. Експертите препорачуваат избор на поевтини парчиња месо, подготовка на јадења кои го „развлекуваат“ месото (чорби, манџи, пасти) и воведување на „ден без месо“ барем еднаш неделно
Проценките покажуваат дека просечното домаќинство губи значителна сума пари секоја година поради неискористена храна. Паметното планирање и правилното складирање на остатоците можат да ви донесат дополнителни заштеди без големи жртви во вашиот животен стил.
