Светот е во исчекување на понеделник наутро кога се отвораат светските берзи на енергенси во период кога ескалира војната помеѓу Иран од една и Израел и САД од друга страна.
Последната недела цената на суровата нафта енормно порасна а во петокот на затворањето на берзите барел Брент сурова нафта чинеше над 92 долари за барел.
Меѓународни експерти и организации оценуваат дека по затворањето на Ормутскиот теснец и пореметување на синџирот на понуда и побарувачка, барел нафта веќе од следната недела може да ја пробие границата од 100 долари за барел.
Цена од 150 долари за барел веќе до крајот на месецот?
Такво предупредување даде и познатата банка Голдман Сакс од каде велат дека глобалните цени на нафтата би можеле да ја надминат границата од 100 долари за барел во рок од неколку дена и да достигнат 150 долари за барел до крајот на месецот, ако не се најде решение за сериозното нарушување на протокот на сурова нафта низ Ормутскиот теснец.
Претходно, слична прогноза дадоа и катарските власти кои предупредија дека ако војната продолжи барел нафта за неколку недели ќе чини и 150 долари.
Катар го намали производството на нафта, а претходно целосно го запре производството на природен гас.
Поради војната на Блискиот исток намалено производство има и во ОАЕ и во Кувајт, како и во самиот Иран кој е учесник во војната.
Меѓународниот референтен ценовен праг кусо се качи на над 120 долари за барел во 2022 и достигна рекордни 145 долари во 2008 по што и во двата случаи имаше страшни последици за глобалната економија.
