Истражувањето, спроведено од Универзитетот Борнмут и проектот „Wight Squirrel“, открива дека климатските промени немаат директно негативно влијание врз бројноста на црвените верверички. Тимот на чело со конзервацискиот биолог д-р Алисoн Бјукенен користел климатски модели за да предвиди како овој вид ќе се снајде под различни сценарија на глобално затоплување. Според резултатите, поголеми закани претставуваат губењето на живеалиштата, недостигот на храна, болестите и конкуренцијата со сивата верверичка – инвазивен вид донесен од САД.
„Моделите покажуваат дека моменталните климатски шеми не влијаат директно врз популациите на црвената верверичка,“ изјави Бјукенен. „Она што е многу поважно е да се справиме со другите закани – пред сè со губење на шумите и натпреварот со сивата верверичка.“
Во Обединетото Кралство, црвената верверичка е речиси целосно потисната од својот сивороден ривал, но сепак успева да опстане на места како Островот Вајт, каде што географската изолација го спречува навлегувањето на сивите верверички.
Истражувањето доаѓа во време кога научниците сè почесто откриваат дека животните имаат изненадувачки начини да се приспособат на климатските промени. Морските риби-кловнови, познати од филмот „Наоѓајќи го Немо“, можат да го намалат сопственото тело за време на топлотни бранови во океаните, со што ја намалуваат потребата за енергија и ги зголемуваат шансите за преживување. Слична стратегија користат и морските игуани за време на феноменот Ел Нињо.
И на копно, конзервациските проекти добиваат нова димензија – во Шкотските висорамнини до 2026 година се планира пуштање на стадо од 15 тауроси, модерна раса на големи диви говеда, кои со своето движење низ почвата треба да помогнат во враќањето на биодиверзитетот, апсорпцијата на јаглеродот и развојот на еко-туризмот.
Сепак, експертите предупредуваат дека природната отпорност на видовите не смее да се сфати како гаранција. „Факторите како што се живеалиштата, достапноста на храната, болестите и конкуренцијата со други видови се клучни и ја потенцираат потребата да продолжиме со активни мерки за заштита,“ нагласува Бјукенен.
Црвената верверичка можеби е мала, но нејзината борба за опстанок во променливата клима станува голема инспирација за науката и конзервацијата.
Извор: Euronews
