Во Македонија, топлиот бран достигна врв денес со температури до 37 степени, но од викендот се очекува значително освежување. Во сабота времето ќе биде умерено до претежно облачно со врнежи на север и запад, а дневните температури ќе се спуштат на 20 до 26 °C.
Синоќа Хрватска беше погодена од силно невреме, особено Истра, каде во Умаг и околината падна град со големина на орев и за кратко време наврна 100 литри дожд на квадратен метар. Улиците беа поплавени, а метеоролозите предупредуваат на нови обилни врнежи и во следните денови.
Слична нестабилност се очекува и во Србија. РХМЗ најавува поројни дождови, грмежи и локална појава на град, а на одредени места и силен ветар. Најризични ќе бидат западните и југозападните делови, преку Шумадија и Поморавје до истокот на земјата.
Босна и Херцеговина веќе денес ќе биде зафатена од облачност и врнежи, особено во западните и југозападните области, додека во петок речиси целата земја ќе има дожд и грмежи со пад на температурите за околу десет степени.
Метеоролозите предупредуваат на можни краткотрајни поплави, оштетување од град и проблеми во сообраќајот, а за конкретни локации ќе се издаваат навремени предупредувања.
Од недела се очекува стабилизација на времето, со пријатни температури меѓу 22 и 28 степени, додека на југот на Балканот температурите ќе достигнат до 31 °C.
Извор: Плусинфо.мк
