На меѓународните пазари, цената на нафтата порасна над 72 долари за барел, поттикната од загриженоста на инвеститорите дека одложувањето на нуклеарниот договор меѓу САД и Иран го зголемува ризикот од конфликти кои би ја попречиле снабдувачката линија од Блискиот исток.
На лондонскиот пазар, барелот се тргуваше за 72,39 долари, што е за 1,64 долари повеќе од вчера, а на американскиот пазар цената достигна 66,53 долари, за 1,32 долари повеќе.
Преговори во Женева
САД и Иран одржаа преговори во Женева под посредништво на оманскиот министер за надворешни рабои. Иран инсистира на преговори само за нуклеарниот програм и потенцира право за развој на цивилна нуклеарна енергија. Двете страни постигнаа „значителен напредок“ и планираат продолжување на разговорите по консултации во матичните земји. Техничка расправа е закажана за следната недела во Виена.
Американскиот претседател Доналд Трамп очекува дека договорот би можел да се постигне за десет до петнаесет дена, додека иранскиот колега ја оцени шансата за поволен исход како „добра“.
Геополитички ризик и влијание врз цените
САД испратија два носачи на авиони со придружба на воени бродови, а Иран привремено го затвори Хормушкиот теснец за воена вежба.
Аналитичарите оценуваат дека во вакви услови инвеститорите пресметуваат дополнителен геополитички ризик во цената на нафтата од 4 до 10 долари по барел. Во Лондон просечната цена од почетокот на годината е 70,48 долари/барел, а во САД 65,01 долари/барел
Организацијата на земјите извознички на нафта (OPEC) исто така регистрира пораст од 35 центи, со барел од 69,64 долари.
Цените на нафтата продолжуваат да бидат чувствителни на тековните нуклеарни преговори и геополитичката нестабилност во регионот на Блискиот исток.
