Ако вашето омилено кафе исчезнало од полиците, не грижете се – наскоро ќе се врати. Но, има и лоша вест: ќе биде поскапо за дури 25%.
Големите преработувачи како Lavazza, Illy, Nestlé и JDE Peet’s моментално водат преговори со трговците за зголемување на цените, поради драстичното поскапување на суровите зрна арабика во изминатата година. Според индустриски извори, цените на суровата арабика пораснале поради четири последователни сезони на недостиг, предизвикани од неповолни временски услови.
Колку ќе пораснат цените?
Светските цени на арабика оваа година скокнаа за над 20%, по рекордниот пораст од 70% минатата година. Бразил, најголемиот светски производител, се соочи со една од најлошите суши во историјата.
Според Рег Вотсон од холандската банка ING, ако поскапувањето на суровото кафе целосно се одрази на малопродажните цени, тоа би значело раст од 28%. Но, реално, зголемувањето ќе биде меѓу 15% и 25%.
Во земјите со ослабени валути во однос на доларот, поскапувањето е уште подрастично. Во Бразил, вториот најголем потрошувач на кафе, цените на кафето во продавниците пораснаа за 40% минатата година. Тамошниот најголем преработувач, 3 Coracoes, ги зголеми цените за 14.3% во март, откако веќе ги покачи за 11% во јануари и 10% во декември.
Како реагираат потрошувачите?
Поради растот на цените, многумина веќе почнаа да штедат. Според истражувањето на Nielsen, продажбата на мелено кафе во Северна Америка и Европа паднала за 3.8% минатата година, додека цените се зголемиле за 4.6%.
„Ако порано луѓето правеа големи количини кафе и фрлаа што ќе остане, сега внимаваат да нема отпад,“ вели Павел Кардозо, претседател на Бразилската асоцијација на кафе-преработувачи.
Борба за потрошувачите
Покрај поскапувањата, преработувачите на кафе се соочуваат со конкуренција од приватните брендови на супермаркетите, кои нудат поевтини алтернативи. Според Circana, пазарниот удел на овие брендови се зголемил за 13% во последните три години.
Големите производители се наоѓаат во дилема – дали да апсорбираат дел од трошоците за да ги задржат купувачите, или да ги зголемат цените и да ризикуваат пад на продажбата. Дури и Starbucks, кој е помалку погоден бидејќи суровото кафе сочинува помалку од 2% од цената на едно кафе во кафеана, се соочува со предизвици.
Со сите овие фактори, едно е сигурно – кафето останува неопходен дел од секојдневието, но наскоро ќе чини значително повеќе.
Ќе ја смените ли вашата дневна доза кафе или ќе ја прифатите новата реалност?
