Цената на бакарот продолжи да расте и денес, по првото пробивање на нивото од 13.000 долари по тон, поттикната од ограничената понуда и зголемениот интерес на инвеститорите на глобалните финансиски пазари.
Трогодишните фјучерси на Лондонската берза за метали (LME) забележаа раст до 3,1%, достигнувајќи рекордни 13.387,50 долари по тонa, надминувајќи го максимумот поставен само ден претходно.
Растот на цените е поттикнат од очекувањата дека администрацијата на Доналд Трамп би можела да воведе царини на рафиниран бакар, што предизвика масовно пренасочување на залихите кон САД. Ограничената понуда во остатокот од светот и неспособноста на рударите да ја зголемат производството дополнително го поддржаа растот.
Индексот на Лондонската берза за метали (LMEX), кој ги следи цените на шест клучни метали, достигна највисоко ниво од март 2022 година, додека бакарот од крајот на ноември бележи раст од повеќе од 20%.
Залихите на бакар во складиштата на LME се речиси преполовени во споредба со минатата година, а индикаторите на пазарот укажуваат на краткорочен притисок врз понудата. Американскиот увоз на бакар во декември достигна највисоко ниво од јули, како резултат на оживената трговија по најавите за можни царини во 2026 година.
Министерството за трговија на САД се очекува да објави ажуриран извештај за пазарот на бакар до крајот на јуни, по што ќе следи одлука за можни царини. Претходниот предлог предвидуваше 15% царина од 2027 година, со зголемување на 30% во 2028 година, но планот сè уште не е официјално потврден.
