Американскиот производител на обувки Crocs забележа нагло намалување на вредноста на своите акции за речиси 30%, што претставува најголем еднодневен пад од 2011 година, пренесува Biznis.rs.
Компанијата предупреди дека продажбата се намалува поради комбинација од фактори: увозни царини, намален интерес кај потрошувачите, како и можен крај на популарноста на моделите кои доминираа во изминатите години.
Според нивното соопштение, царинските давачки воведени од администрацијата на Доналд Трамп, како и несигурноста во глобалната трговска политика, значително влијаеле врз профитабилноста.
Дополнително, потрошувачите во САД се соочуваат со зголемени животни трошоци, инфлација и намалена куповна моќ. Главниот извршен директор на Crocs, Ендру Рис, изјави дека многу купувачи избегнуваат да одат во продавници и ги одложуваат купувањата поради економска несигурност и страв од понатамошни поскапувања.
Овој пад ја врати вредноста на акциите на Crocs на најниско ниво во последните три години, откако компанијата доживеа експлозивен раст за време на пандемијата, благодарение на популарноста на удобната обувка.
Во зенитот на популарноста, Crocs стана моден тренд – „златна“ верзија на обувките се појави на црвениот тепих на Оскарите во 2021 година, а Microsoft дури претстави специјално издание со тема Windows XP.
Но, денес, компанијата се соочува со сериозни предизвици – успорување на пазарот на труд, растечки каматни стапки и намалена потрошувачка. Иднината на Crocs сега зависи од способноста да се прилагоди на променетите услови и повторно да го привлече вниманието на пазарот.
