Капсула на компанијата SpaceX треба да транспортира четворица астронаути до Меѓународната вселенска станица (ISS), со што орбиталната лабораторија повторно ќе има полн состав на екипаж по период од околу еден месец со само три члена. Лансирањето на мисијата Crew-12 е планирано најрано во петок во 5:15 часот по источноамериканско време од комплексот на Кејп Канаверал во Флорида.
NASA, која ја ангажира SpaceX за транспорт на астронаути, се обидела да го забрза лансирањето поради недостиг на персонал на станицата. Два претходни термини биле одложени поради неповолни временски услови.
Меѓународната вселенска станица од средината на јануари функционира со тројца членови, наместо вообичаените седум. Намалувањето следеше по предвременото враќање на мисијата Crew-11 поради здравствен проблем на еден член од екипажот. Идентитетот не беше објавен, а според NASA, астронаутот е во стабилна состојба.
По слетувањето на капсулата Crew-11 во океанот кај Калифорнија, четворицата астронаути биле пренесени во болницата Scripps Memorial во Ла Хоља. Екипажот го сочинувале астронаутите на NASA Зена Кардман и Мајк Финке, астронаутот на јапонската агенција JAXA Кимија Јуи и рускиот космонаут Олег Платонов.
Во новата мисија Crew-12 учествуваат астронаутите на NASA Џесика Меир и Џек Хатавеј, астронаутката на Европската вселенска агенција Софи Адено и рускиот космонаут Андреј Федјаев. Поради итното враќање на Crew-11, нема да има вообичаено преклопување на екипажите во орбитата.
На ISS моментално престојуваат руските космонаути Сергеј Куд-Сверчков и Сергеј Микаев, како и астронаутот на NASA Крис Вилијамс, кој пристигнал во рамки на договорот за заеднички летови со Roscosmos.
NASA истакнува дека полниот состав е клучен за максимално искористување на научниот потенцијал на станицата, чија годишна експлоатација чини околу 3 милијарди долари. За време на осуммесечниот престој, Crew-12 планира истражувања поврзани со циркулацијата на крвта, фармацевтски анализи за бактерии што предизвикуваат пневмонија и симулација на слетување на Месечината за проучување на влијанието на промените во гравитацијата врз човечкото тело.
Доколку временските услови дозволат, лансирањето ќе се реализира во планираниот термин, по што ќе следи пристигнување и приклучување на капсулата кон Меѓународната вселенска станица.
