Тетовскиот реге-бенд Conquering Lion ќе го промовира својот нов албум „One World“ со концертен настап во Public Room во Скопје, на 21 март (сабота). Концертот ќе биде прва поголема можност албумот да се слушне во форматот во кој овој бенд има најмногу смисла – во живо.
Conquering Lion припаѓаат на онаа ретка група бендови што не се сведуваат на добра снимка, туку целосно се разбираат дури кога ќе ги слушнеш на сцена. Нивниот звук функционира како колективен чин: стабилен грув, вокал што води без да доминира и ритам што носи порака без потреба од големи пароли. Токму таков пристап го носи и „One World“, шестиот студиски албум на бендот, објавен во октомври 2025 година.
Албумот испраќа јасна порака за љубов, единство и отпор во време на поделби, но без декларативен активизам. Наместо тоа, фокусот е ставен на секојдневните избори, свесноста и истрајноста – теми што Conquering Lion ги градат со години како дел од својот музички и животен став. Дел од материјалот веќе беше претставен и преку live-студиската изведба на песната „Little Things“, снимена во нивното студио Lion’s Den, во продукција на Трн, како јасна изјава за нивниот органски и искрен пристап.
Историјата на бендот започнува во 2007 година во Тетово, а низ годините Conquering Lion израснаа од локален скејт и реге-колектив во бенд со меѓународна концертна биографија. Имаат настапувано низ Европа и делеле сцени со артисти како Manu Chao, Gentleman и Hornsman Coyote, како и на фестивали како InMusic, Таксират и Riding Higher. Нивниот пат од панк и хибриден звук до зрела new roots reggae формација е видлив и во „One World“, кој се смета за нивно најконзистентно и најчисто издание досега.
Промоцијата ќе биде можност публиката да го доживее албумот не како финален производ, туку како жив процес – токму онака како што Conquering Lion го замислуваат регето: тивок, истраен отпор и простор за заедништво.
Влезниците за концертната промоција се во претпродажба по цена од 500 денари во ограничен број и се достапни онлајн преку платформата tix.mk. Настанот ќе се одржи во „Public Room“ во Скопје на 21 март со почеток во 21:00 часот.
Во еден разговор со Трн, Мане ни раскажа дека „One World“ не е само музички проект, туку манифест за човечност. „Повеќе мир, повеќе љубов, повеќе толеранција, повеќе разбирање меѓу луѓето… Ако тоа го разбереме, човештвото може да се насочи кон нешто покорисно – културно, духовно и човечки.“
Conquering Lion е формиран на 7 април 2007 година во Тетово. Првиот албум „I“ го издава во октомври 2009 година за PMG Recordings, со десет песни, меѓу кои и соработка со јамајканскиот артист Jah Clarity на песната „Jah Love“.
Вториот албум „Know Your Wisdom“ беше објавен на 26 август 2011 година, по што следуваше 30-дневна балканска турнеја. Третиот студиски албум „Revelation“ излезе на 22 ноември 2013 година за „Password Productions“, а по неговото објавување бендот реализираше европска турнеја.
Во 2017 година Conquering Lion го издаде четвртиот албум „Land Of Confusion“ за американската издавачка куќа Locksmith Records од Њу Џерси. Албумот влезе во преноминациите за најдобар реге албум на Греми наградите и беше номиниран за албум на годината од реге порталот „Reggaeville“.
Петтиот студиски албум „Revolution Time“ беше објавен на 30 март 2020 година за „Rehegoo Music“ од Лондон. Во 2021 година бендот го издаде синглот „Long Time“ во соработка со македонската пејачка Дани Димитровска.
Со овој албум, Conquering Lion покажува дека и од Тетово може да се создаде звук што патува далеку, но останува искрен кон своите корени.
