Патот на Conquering Lion секогаш бил повеќе од музика. Тоа е начин на живот, став и бунт против рамнодушноста.
Во нивниот шести студиски албум „One World“, бендот ја артикулира својата најчиста порака досега – повеќе љубов, повеќе разбирање, помалку омраза и поделби.
„Бабилон е свугде околу нас, живееме во него,“ вели Мане, фронтменот на бендот.
Новиот материјал ги спојува roots reggae темелите со современиот „new roots“ израз – звук што балансира меѓу традицијата и модерното.
„Овој албум е најблиску до звукот што го бараме – светски, но со наш дух,“ додава Папан, басист и еден од основачите на групата.
Историјата на Conquering Lion почнува од скејт-културата во Тетово – со неколку млади луѓе кои ја барале својата слобода на улицата и во музиката.
„Скејтот нè спои, сите бевме поинакви, никој не слушаше турбо-фолк,“ раскажува Папан.
Од тој урбан дух се раѓа звук што ќе ги спои панкот и регето – првиот албум бил хибрид, вториот веќе целосно реге, а денес, со шестиот, бендот стигнува до својата најзрела форма.
„Тоа е нашиот пат – new roots, модерен звук, но со душа што останува вистинска.“
„One World“ не е само музички проект, туку манифест за човечност.
„Повеќе мир, повеќе љубов, повеќе толеранција, повеќе разбирање меѓу луѓето,“ вели Мане. „Ако тоа го разбереме, човештвото може да се насочи кон нешто покорисно – културно, духовно и човечки.“
Со овој албум, Conquering Lion покажува дека и од Тетово може да се создаде звук што патува далеку, но останува искрен кон своите корени.
