Чистењето снег пред домот често се доживува како рутинска обврска, но лекарите предупредуваат дека за одредена група граѓани тоа може да претставува сериозен здравствен ризик. Особено се изложени лицата кои имаат или имале срцеви заболувања, бидејќи физичкиот напор на температури под нулата може значително да го оптовари срцето.
Кардиолозите советуваат луѓето кои се лекувале од срцеви болести да избегнуваат напорно чистење снег кога температурите се ниски. Кај овие лица постои зголемен ризик од преоптоварување на срцето, а во најтешките случаи и од срцев удар.
Според кардиологот Томас Војтлендер, на ниски температури крвните садови се стеснуваат, поради што срцето мора да работи поинтензивно за да го снабди телото со кислород. Овој дополнителен напор, во комбинација со физичка активност како што е лопатaњето снег, може да биде опасен за лица со ослабено срце.
Посебна внимателност им се препорачува на луѓе со висок крвен притисок, коронарна срцева болест, ангина пекторис, атријална фибрилација, претходен срцев застој или длабока венска тромбоза. Лекарите нагласуваат дека тоа не значи целосно избегнување на движење во зима, туку прилагодување на активностите.
Кардиолозите препорачуваат полесни прошетки наместо тешка физичка работа, како и соодветна заштита при излегување на студ. Германско кардиолошко здружение советува срцевите болесници да носат шал или маска преку носот и устата, со цел во дишните патишта да влегува потопол воздух.
При екстремно ниски температури, на лицата со срцеви проблеми им се препорачува да останат во затворен, загреан простор и да вежбаат дома. Истото здружение предупредува и дека студените домови претставуваат дополнителен ризик, па се советува престој во соодветно загреана средина во текот на зимските месеци.
