По повеќе од половина век, човештвото повторно се упатува кон Месечината. Мисијата „Артемис II“ претставува историски момент во модерната вселенска ера и прв човечки лет во длабока вселена по ерата на програмата „Аполо“.
Мисијата, организирана од НАСА, ќе трае околу 10 дена и ќе вклучува четворица астронаути кои ќе ја обиколат Месечината без слетување, пред да се вратат на Земјата со брзина од околу 40.000 километри на час. Иако не станува збор за слетување, ова патување има клучна улога да ги тестира сите системи неопходни за идните мисии.
„Артемис II“ е втора фаза од новата американска програма за враќање на луѓето на Месечината, по успешната непилотирана мисија „Артемис I“ во 2022 година. Астронаутите ќе патуваат со леталото „Орион“, кое за првпат ќе превезува луѓе, лансирано со ракетата „Спејс Лонч Систем“ најмоќниот ракетен систем развиен во поновата историја.
Целта на мисијата не е спектакуларно слетување, туку целосно тестирање на технологијата, од системите за животна поддршка до навигацијата и безбедноста. Со тоа, НАСА сака да потврди дека е подготвена за следниот чекор: враќање на астронаути на површината на Месечината.
Во екипажот се тројца американски и еден канадски астронаут, што ја нагласува меѓународната димензија на програмата. Ова е и сигнал дека идните мисии во вселената ќе бидат резултат на глобална соработка, а не само на една држава.
Покрај техничките тестови, астронаутите ќе имаат задача да ја фотографираат и анализираат површината на Месечината, вклучително и делови кои ретко биле видени од човек. Ќе се тестираат и нови системи во леталото, вклучувајќи и практични решенија за долготрајни мисии, кои во иднина ќе бидат неопходни за подолги престои во вселената.
Иако изгледа како „подготвителна“ мисија, „Артемис II“ има огромно значење. Таа претставува прв чекор кон повторно човечко присуство надвор од орбитата на Земјата и поставува темели за идни мисии, вклучително и планираното слетување со „Артемис III“.
На подолг рок, целта е многу поголема – изградба на постојана база на Месечината и создавање услови за мисии кон Марс. Со „Артемис II“, всушност, започнува ново поглавје во истражувањето на вселената, во кое човештвото повторно се враќа таму каде што застана пред повеќе од 50 години – но со многу поамбициозни планови.
