Овој необичен производ е дел од нов тренд во кој производителите на чоколадо експериментираат со алтернативни состојки и технологии за да ги направат своите производи поодржливи и помалку зависни од традиционалните какао зрна.
Чоколадната индустрија под притисок
Се зголемуваат и цените и побарувачката за чоколадо, додека приносите на какао опаѓаат. Оваа комбинација ги принудува компаниите да бараат нови, понекогаш изненадувачки решенија. Некои бренди, пак, прибегнаа кон користење на „чоколаден вкус“ наместо вистинско чоколадо, менувајќи ги рецептите за да го намалат производствениот трошок.
Така, популарните британски слатки McVitie’s Penguin и Club барови, како и KitKat White и McVitie’s White Digestives, веќе не смеат да се продаваат како „чоколадо“ – бидејќи не содржат доволно какао.
„Ако денес користите вистинско чоколадо – значи сте во криза,“ вели Марк Голдер, извршен директор на компанијата Win-Win, која произведува чоколадо без какао. „Цените на какаото се зголемија повеќе од четирикратно во последните три години. За многу мали бизниси, тоа е прашање на опстанок.“
Чоколадо од ориз – технологија што го имитира вкусот на вистинското
Компанијата Win-Win користи ферментирани житарки и мешунки, меѓу кои и ориз, за да го реплицира вкусот, текстурата и топењето на вистинското чоколадо. Процесот е сличен на традиционалното производство – вклучува ферментација, сушење и печење.
„Оризот е основната состојка – и тоа навистина ги изненадува луѓето,“ вели Голдер. „Преку ферментацијата се создава комплексен вкусен профил, а со додавање на состојки како масти и шеќери добиваме производ што изгледа, има вкус и се топи како вистинско чоколадо.“
Според него, интересот за вакви алтернативи експлодирал во последните 18 месеци. „Имаме барања од купувачи од цела Европа и пошироко. Светот го обожава чоколадото, но какао дрвјата се мачат – климатските промени секоја година го намалуваат приносот, а 75% од светското какао доаѓа од Гана и Брегот на Слоновата Коска, каде што сè уште има проблеми со уништување шуми и детски труд,“ додава тој.
Иновации од Швајцарија до Калифорнија
Швајцарскиот производител Barry Callebaut соработува со Универзитетот за применети науки во Цирих за развој на т.н. клеточно-култивирано чоколадо – создадено од клетки на какао растение што се одгледуваат во лабораторија и произведуваат исти вкусови и масти како вистинското чоколадо, но без потреба од дрвја.
Во Германија, компанијата Planet A Foods, позната по брендот ChoViva, користи овес и сончогледови семки кои се печат и ферментираат за да создадат чоколадо без какао. Тие тврдат дека нивниот процес произведува до 90% помалку јаглеродни емисии и користи 90% помалку вода. Производството веќе надминува 10.000 тони годишно, а меѓу партнерите им се Aldi и Lidl.
Во САД, стартапот Voyage Foods развил чоколадна алтернатива од семки од грозје, протеин од сончоглед и ши путер, обезбедувајќи повеќе од 40 милиони долари инвестиции за проширување на производството.
„Здраво“ чоколадо – или само маркетинг?
Професорот Тим Спектор, коосновач на британската компанија за здравје и исхрана Zoe, смета дека ваквите иновации се дел од поширока револуција во храната. „Алтернативите без какао се возбудливи од еколошка гледна точка,“ вели тој. „Но нов процес не значи автоматски и подобра исхрана.“
„Темното чоколадо содржи флаваноли и други биолошки активни соединенија кои се добри за срцето, притисокот и дигестијата. Засега не знаеме дали овие нови производи ги имаат истите придобивки,“ објаснува Спектор.
Тој предупредува дека додека новите „чоколадни“ производи можат да бидат подобри за планетата, најздрава опција за луѓето останува висококвалитетното темно чоколадо со висока содржина на какао и ферплеј производство.
Колку вистинско какао има во вашето омилено чоколадо?
Со цените на какаото кои повеќе од двојно се зголемија во последните две години поради лошите жетви во Западна Африка, производителите се соочуваат со избор – да ги зголемат цените или да ги променат рецептите.
И додека темното чоколадо со висок процент какао останува симбол на квалитет, иднината можеби ќе донесе нешто сосема ново: чоколадо без какао – создадено во лабораторија или од нешто што денес ни звучи навистина необично, како ориз или овес.
Извор:The Guardian
