Маскирани федерални агенти со автоматско оружје патролираат низ центарот на градот, хеликоптери надлетуваат, а граѓани со наведнати глави бегаат од облаци сузавец. Сцените изгледаат надреално, но се дел од секојдневието кое полека, но сигурно, станува реалност за жителите.
Во сржта на овој нов бран тензии стои едно име – ICE. Тоа е кратенка за Immigration and Customs Enforcement, американската федерална служба за имиграција и царини, која повторно е ставена во преден план со враќањето на Доналд Трамп во Белата куќа. Од јануари 2025 наваму, администрацијата на Трамп ги заострува имиграциските политики и се обидува да спроведе масовни депортации во градови каде локалните власти не сакаат да соработуваат – како што се Чикаго, Лос Анџелес и Портланд.
На 4 октомври, претседателот официјално одобри распоредување на 300 припадници на Националната гарда во Чикаго, под изговор дека треба да ја заштитат федералната имовина и службеници. Но според многумина, ова е само изговор за заплашување и контрола врз локалното население, особено имигрантите. Во исто време, агенти на ICE изведуваат рации во квартови како Брајтон Парк и Литл Вилиџ, при што користат сузавец, воен тип на тактики и хеликоптери. На социјалните мрежи се појавија снимки на кои се гледаат деца и постари лица кои повраќаат од хемиски агенси фрлени на отворено.
Во една таква рација, двегодишно дете заврши на итна медицинска помош. Основно училиште мораше да се затвори откако воздухот околу објектот беше загаден од хемикалии. Тоа не беше инцидент, туку само дел од пошироката кампања која сега локалните лидери ја нарекуваат „внатрешна окупација“.
Гувернерот на Илиноис, демократот Џеј Би Прицкер, остро реагираше:
„Ова не е спроведување на ред, ова е расно профилирање. Луѓето со кафеава и црна кожа се приведуваат само затоа што изгледаат како имигранти. Ова не е Америка каква што ја знаеме.“
Но Белата куќа не попушта. Претседателот Трамп во повеќе наврати изјави дека нема да дозволи „градови со слаба управа“ да бидат „засолништа за криминалци“. Во своите обраќања, особено на социјалните мрежи, тој повикува на побрзи акции и најавува дека по Чикаго ќе следуваат и други градови.
И додека администрацијата зборува за закон и ред, на улиците на Чикаго е хаос. Федералните агенти, дел од нив без ознаки, дел под маски, се движат низ населби и прават масовни проверки. Граѓаните, особено оние со латино или блискоисточно потекло, живеат во страв. Сѐ повеќе организации објавуваат дека федералците влегуваат во домови без налог, апсат луѓе без причина и ги носат на непознати локации.
Во исто време, насилството во Чикаго расте. Само од петок до недела, според полициски извештаи, се случиле 22 пукања во кои загинаа четворица, а биле повредени 17 лица. И покрај тоа што според некои извештаи насилниот криминал е во опаѓање, чувството на безбедност во градот никогаш не било понесигурно.
Две Америки – и двете во судир
Она што се случува во Чикаго не е изолиран случај. Тоа е симптом на многу подлабока поделба. Денес во САД постојат две визии за државата:
- Едната, прогресивна и инклузивна, верува дека имигрантите се срцето на Америка и заслужуваат заштита и интеграција.
- Другата, конзервативна и рестриктивна, гледа во имиграцијата закана за безбедноста и културниот идентитет на државата.
Додека двете страни се обвинуваат меѓусебно – за расизам, за слободоумност, за насилство, за предавство – вистинските последици ги трпат обичните граѓани. Во оваа тензична и политички наелектризирана атмосфера, прашањето не е само што ќе се случи со Чикаго, туку што ќе стане со целата земја.
Дали САД се на пат повторно да се поделат – не формално, туку суштински, идеолошки, со две реалности, два правни системи и два погледа на тоа што значи да се биде Американец?
Во меѓувреме, улиците на Чикаго ќе останат тивки само навидум. Под површината тлее бунт, страв и многу отворени прашања. Иако ова е само еден град, приказната што се развива таму е онаа што лесно може да стане – приказна за целата држава.
Извор: N1info.rs
