Долниот дом на Конгресот треба да гласа оваа недела за мерката, која би овозможила повторно отворање на владата.
За разлика од Сенатот, Републиканците во Претставничкиот дом, кои имаат тесно мнозинство, не им требаат гласови од Демократите за усвојување на буџетот — но нивниот простор за грешка е исклучително мал. Еве ги четирите клучни препреки што би можеле да го забават или блокираат процесот пред законот да стигне до претседателот Доналд Трамп на потпис.
1. Ќе попуштат ли Републиканците во однос на здравственото осигурување?
Главна точка на судир е барањето на Демократите буџетската мерка да вклучи продолжување на даночните олеснувања што им помагаат на околу 24 милиони Американци да имаат поевтино здравствено осигурување.
Сенатот, сепак, се согласи само Демократите да добијат посебно гласање во декември за тоа прашање – понуда што веќе еднаш беше дадена претходно. Претседателот на Претставничкиот дом, Мајк Џонсон, во понеделникот одби да се обврзе дека ќе дозволи слично гласање во неговата комора.
Ова носи значителен политички ризик за Републиканците: ако ги блокираат субвенциите, цените на осигурување би можеле нагло да пораснат, што би им овозможило на Демократите силна изборна тема пред среднорочните избори следната година.
Дури и некои конзервативни републиканци, како Марџори Тејлор Грин од Џорџија, предупредија дека партијата мора да спречи зголемување на премиите. Републиканците бараат воведување доходовни лимити за примателите на даночните кредити и предлагат средствата да одат директно кај граѓаните, а не преку осигурителните компании, но деталите сè уште не се јасни.
2. Колку ќе биде силен отпорот кај Демократите?
Иако се во опозиција, Демократите почувствуваа политички подем по изборните победи минатата недела во Вирџинија, Њу Џерси и Њујорк, но поделбите меѓу прагматичкото и прогресивното крило се продлабочија.
Левицата е бесна на своите колеги кои во Сенатот гласаа заедно со Републиканците, сметајќи дека тоа претставува капитулација пред Трамп. Сенаторот Берни Сандерс ја нарече одлуката „ужасна грешка“, а гувернерот на Калифорнија Гевин Њусом ја опиша како „предавање“.
Прогресивниот конгресмен од Тексас, Грег Казар, предупреди: „Договор што не ги намалува трошоците за здравствена заштита е предавство на милиони Американци што сметаат на нас.“
Од друга страна, умерените демократи како Џаред Голден од Мејн и Хенри Куeљар од Тексас, би можеле да гласаат за буџетот, со цел „да се стави земјата пред партијата“ и да се врати нормалното функционирање на владата.
3. Го имаат ли Републиканците потребното мнозинство?
Републиканците имаат 219 места во Претставничкиот дом, наспроти 213 на Демократите, што значи дека можат да си дозволат да изгубат само два гласа.
Иако мнозинството републиканци ќе го поддржат буџетот, има неколку тврди „фискални јастреби“ кои се против. Томас Меси од Кентаки најави дека повторно ќе гласа против, како и во претходните случаи, поради високите трошоци.
Според предлогот, федералниот дефицит би продолжил да се зголемува за околу 1,8 трилиони долари годишно, додека националниот долг веќе изнесува околу 38 трилиони долари.
Сенаторот Ренд Пол, исто така од Кентаки, беше единствениот републиканец во Сенатот кој гласаше против, нарекувајќи го предлогот „финансиска безодност“.
Конзервативната група House Freedom Caucus бара поцврст и подолгорочен буџет со строга контрола на трошењата, што би можело дополнително да ја комплицира ситуацијата.
4. Ќе влијае ли хаосот во воздушниот сообраќај на гласањето?
Спикерот Џонсон го држеше Претставничкиот дом во пауза седум недели, надевајќи се дека Сенатот ќе попушти. Сега повика пратениците итно да се вратат во Вашингтон, со гласање најрано во среда попладне.
Но патувањето до главниот град е проблем. Поради недостиг на контролори на летови кои работат без плата, бројот на домашни летови ќе се намали за 6% од вторник, а дополнителни доцнења предизвикуваат и екстремно ниски температури и снег во регионот на Големите Езера.
Таквите услови би можеле да го одложат гласањето и дополнително да ја продолжат неизвесноста околу крајот на историската блокада на американската влада.
Извор: BBC
