На состанок одржан на 19 април 2025 година, вработените формулираа четири јасни барања, меѓу кои најитно е обраќање од страна на раководството на РТС, како и оставки од уредниците и новинарите кои, како што наведуваат, ги прекршиле медиумските закони и новинарската етика.
„Бараме итно обраќање од раководството на РТС и надлежните служби со јасни насоки за нашата работа додека трае блокадата. Доколку тоа не се случи во најкус можен рок, ќе го сметаме за повлекување од одговорност и неспособност за управување со јавниот медиумски сервис,“ се вели во првото барање од соопштението.
Второто барање се однесува на оставки од сите уредници и новинари кои не ги почитувале медиумските закони и Кодексот на новинарите, и дозволиле во емисии како „Дневник 2“ да бидат изнесени невистини и навреди кон колеги, студенти и граѓани. Како што наведуваат, дополнителна причина за овие оставки е и одговорноста пред сите граѓани на Србија заради ширењето на цензурирани и невистинити информации, што не прилега на ниту еден јавен сервис.
Третото барање се однесува на враќање на вистинито и професионално известување, независна работа и почитување на новинарските стандарди. Собирот бара итна промена на уредувачката политика на информативната програма на РТС и нејзино усогласување со важечките закони и професионалните етички норми. Посебно го нагласуваат неинформирањето за студентскиот протест од 15 март, за кој Архивата на РТС останала без документација, што значи дека идните генерации новинари ќе мора да се потпрат на материјали од други телевизии.
Четвртото барање се однесува на прекинување на праксата на испраќање хонорарни новинари и техничари на високо ризични терени, како што се протестите и митинзите. „Поради нивната несигурна работна позиција, ова претставува злоупотреба што мора веднаш да престане,“ се наведува во соопштението.
Зградата на РТС во улицата Таковска, како и студиото на Кошутњак, се под блокада веќе седми ден од страна на студенти со поддршка од граѓаните, кои протестираат против работата на јавниот сервис.
