Новите електронски сообраќајни знаци веќе се поставени на дел од автопатот D3, кој го поврзува Прага со Линц, а пилот-проектот официјално ќе започне кон крајот на септември.
Моментално, делница долга 50 километри меѓу Tábor и České Budějovice е опремена со променлива сигнализација. Иако зоната сè уште не е целосно отворена за сообраќај, Управата за патишта и автопати на Чешка потврди дека тестирањето наскоро ќе започне.
Како ќе функционира новото ограничување?
- Вообичаено ограничувањето на брзината во Чешка е 130 км/ч.
- Новиот систем ќе дозволува возење до 150 км/ч само при добри услови – сува коловозна површина, добра видливост и уреден сообраќаен тек.
- Во услови на дожд, снег или мраз, брзината автоматски ќе се намали за најмалку 20 км/ч.
Проектот чинеше 2,2 милиони евра, а беа поставени 42 дигитални сообраќајни знаци. Владата најави дека мерката ќе се прошири и на други автопати, меѓу кои D1 кон Острава и D11 во правец на Храдец Кралове.
Брзина и безбедност
Иако проценките покажуваат дека возачите на 50-километарската делница ќе заштедат само околу 3 минути, властите нагласуваат дека безбедноста останува врвен приоритет.
Со оваа промена, Чешка ќе стане втората „најбрза држава“ во Европа, веднаш зад Германија – каде на многу делници воопшто нема ограничување на брзината.
За споредба:
- Во Бугарија, Полска и Турција максималната дозволена брзина е 140 км/ч.
- Во поголемиот дел од Европа ограничувањето е 130 км/ч или помалку.
- Австрија меѓу 2018 и 2020 година тестираше лимит од 140 км/ч, но проектот беше укинат поради загриженост за емисиите на CO₂.
- Во Холандија, од 2020 беше воведено дневно ограничување од 100 км/ч, но од април 2025 на одредени делници повторно е дозволена побрза возачка и во текот на денот.
