OpenAI официјално најави голема промена за ChatGPT: реклами наскоро ќе се појавуваат во бесплатната верзија и во новиот „ChatGPT Go“ план. Ова значи дека услугата која до неодамна беше речиси целосно без реклами, сега се движи кон модел што комбинира бесплатен пристап со финансирање од рекламирање.
Во пракса, рекламите нема да влијаат на одговорите на моделот и ќе бидат јасно означени како комерцијална содржина. Наместо класични банери, рекламите ќе се појавуваат под релевантни одговори, поврзани со темата за која разговара корисникот. На пример, ако побарате рецепт, под одговорот може да се појави реклама за производ поврзан со таа храна.
Првата фаза од тестирањето започнува наскоро во САД и најмногу ќе ги засегне корисниците на бесплатната верзија и претплатниците на „ChatGPT Go“. Корисниците што плаќаат претплати Plus, Pro, Business или Enterprise нема да гледаат реклами. Исто така, рекламите нема да се прикажуваат на лица под 18 години или во разговори за чувствителни теми како здравје, ментално здравје или политика.
Ова претставува голем пресврт во историјата на ChatGPT. Наместо да ги гледаат реклами на традиционален начин, како на Google, YouTube или Instagram, корисниците сега ќе се соочат со реклами директно поврзани со прашањата што ги поставуваат, што создава нов простор за прецизно таргетирање и интеракција со компаниите во вистинско време на интерес.
Рекламите ќе бидат неинвазивни, нема да ја менуваат содржината на одговорите, а компаниите ќе мора да се прилагодат на нов формат каде интеракцијата и ангажманот стануваат поважни од класичните кликови. Ова претставува сосема нов пристап кон дигиталното рекламирање: реклами што се природно вградуваат во интеракцијата со вештачката интелигенција, наместо да го прекинуваат корисничкото искуство.
Со воведувањето на реклами, ChatGPT сега станува нов и уникатен простор за рекламирање, со потенцијал да ја промени динамиката на дигиталниот маркетинг, но и да ја предизвика трпеливоста на корисниците кои навикнале на чист и безпрекорен интерфејс.
