Дел од таванот се урна во големата сала на Центарот за култура во Битола. Во моментот на инцидентот немало публика, но од безбедносни причини сите настани се привремено откажани.
Инцидентот се случил во просторот каде редовно се одржуваат концерти, културни настани и кино-проекции. Според информациите од установата, оштетувањето било забележано претходниот ден, по што биле отстранети десетина иверици од таванот за да се спречи поголема опасност.
Директорот на Центарот за култура, Сашо Илковски, изјави дека веќе се бараат компании за санација и дека поправките треба да започнат во наредните денови.
Првичните проценки укажуваат дека причината е дотраеност на конструкцијата, а не прокиснување на покривот. Слични проблеми со плафонот биле регистрирани и во минатото, но тогаш биле спроведувани само делумни интервенции.
Поради безбедносни причини, сите активности во големата сала се привремено откажани, вклучувајќи кино-проекции и најавен хуманитарен настан.
Центарот за култура во Битола е изграден во 1980 година и веќе подолг период се соочува со инфраструктурни предизвици кои бараат посериозна реконструкција.
