Светските цени на нафтата продолжуваат да паѓаат. Брент во средата се спушти на 86,92 долари по барел, а американската WTI на 83,1 долари, откако пазарите реагираа на информациите дека Меѓународната агенција за енергетика разгледува досега најголемо ослободување на стратешки нафтени резерви. Тоа поевтинување, сепак, нема да се почувствува на македонските пумпи – барем не оваа недела.
Понеделник – единствениот ден кога цените можат да се сменат
Со измените на правилникот од 4 март, РКЕ утврди дека седници за усогласување на малопродажните цени одржува само еднаш неделно – во понеделник. Тоа значи дека евентуалниот пад на светската нафта може да се преточи во пониски цени на пумпата дури со следната редовна пресметка. До тогаш важат цените донесени на 9 март: 85,50 денари за дизел, 79,50 за Еуросупер 95 и 81,50 за Еуросупер 98.
Привремено смирување или траен тренд
Финансиските аналитичари предупредуваат дека евентуалното пуштање резерви би можело само привремено да го смири растот на цените. Со 14 нападнати бродови во Ормускиот Теснец и без јасен крај на конфликтот, нафтениот пазар останува под притисок. Македонија го купи поскапувањето во вторникот – а поевтинувањето, ако дојде, ќе чека до следниот понеделник.
