Лари Финк, извршен директор на BlackRock, предупреди дека доколку цената на нафтата достигне 150 долари по барел, светот може да се соочи со глобална рецесија. Тој посочува дека исходот ќе зависи од развојот на конфликтот на Блискиот Исток и улогата на Иран на енергетскиот пазар.
Финк во интервју за BBC истакна дека високите цени на енергијата веќе создаваат притисок врз економиите и дека долгорочното задржување на тие нивоа би имало сериозни последици.
BlackRock управува со имот вреден околу 14 трилиони долари, што му дава значителен увид во глобалните финансиски текови и пазарни ризици.
Финк опиша две можни сценарија. Доколку конфликтот се смири и Иран повторно се интегрира на меѓународниот пазар, цените на нафтата би можеле да се стабилизираат или да паднат. Но, ако тензиите продолжат, постои ризик цената да се задржи блиску до 150 долари, што би довело до „остра и длабока рецесија“.
Зголемените трошоци за енергија веќе ја поттикнуваат дебатата за зголемување на домашното производство на нафта и гас, особено во Европа. Индустриски организации предупредуваат дека зависноста од увоз може дополнително да ги зголеми ризиците за економијата.
Финк нагласува дека достапната енергија е клучна за економски раст и животен стандард, а најголем товар од поскапувањата чувствуваат ранливите категории граѓани.
Сепак, тој уверува дека сегашната ситуација не е споредлива со финансиската криза од 2007–2008 година, бидејќи финансискиот систем денес е поотпорен, а проблемите се ограничени на одредени сегменти од пазарот.
