Силната бура „Кристин“ утрово предизвика сериозни штети во централниот и северниот дел на Португалија, оставајќи повеќе од 800.000 граѓани без електрична енергија, соопштија надлежните служби.
Според податоците на цивилната заштита, бурните налети на ветер, кои достигнувале и до 150 километри на час, рушеле дрвја и електрични столбови, оштетувале куќи и предизвикале сериозни нарушувања во патниот и железничкиот сообраќај.
Најмалку едно лице го загуби животот откако дрво паднало врз автомобил во местото Вила Франка де Шира, во близина на Лисабон, информираа итните служби.
Надлежните регистрирале околу 1.500 инциденти поврзани со невремето, предизвикани од комбинација на силен ветер, обилни врнежи од дожд, а во некои региони и снег, редок феномен за земја со речиси 11 милиони жители.
Операторот на електроенергетската мрежа E-Redes соопшти дека техничките екипи работат на повторно воспоставување на снабдувањето со струја за околу 855.000 корисници, но дека интервенциите биле отежнати поради екстремните временски услови.
Невремето се прошири и кон Шпанија
Бурата подоцна се прошири кон исток, зафаќајќи делови од Шпанија, која сè уште се справува со последиците од претходната бура „Жозеф“. Во приморскиот град Торемолинос, силен ветер урнал палма, при што една жена го загуби животот.
Во Шпанија, повеќе од 160 патишта беа погодени од снег, вклучително и 27 автопати од главната патна мрежа, меѓу кои и автопатот А-6 што го поврзува Мадрид со северозападот на земјата. Снег ги покри и крововите во делови од централниот дел на Мадрид, но без поголеми нарушувања во секојдневното функционирање.
Националната метеоролошка агенција на Шпанија предупреди дека големи делови од земјата се соочуваат со исклучително силни ветрови, кои на одредени места може да достигнат и ураганска јачина. Во делови од јужната покраина Алмерија беше издадено црвено предупредување поради екстремните временски услови.
