Бугарија располага со залихи на бензин доволни за околу еден месец, додека се подготвува за почетокот на американските санкции против руската компанија „Лукоил“, изјави претседателот на Државната агенција за резерви Асен Асенов.
Санкциите, кои стапуваат на сила на 21 ноември, ќе погодат компании како „Лукоил“ и „Росњефт“, кои се веќе под мерки од САД и Велика Британија поради војната во Украина.
„Лукоил“ управува со рафинеријата во Бургас, најголемата во земјата и клучен дел од бугарската енергетска инфраструктура, како и со стотици бензински пумпи низ целата држава.
Според Асенов, Бугарија има залихи на бензин за 35 дена и дизел за повеќе од 50 дена, пренесе државната новинска агенција БТА.
Загриженост за снабдувањето
Енергетски аналитичари предупредуваат дека дел од резервите на сурова нафта и готови деривати се надвор од земјата, па властите треба итно да ги увезат пред санкциите да ја погодат цевководната мрежа на Лукоил.
„Околу 50% од готовите горива се во други држави на ЕУ, како и дел од суровата нафта. Владата мора веднаш да ги активира увозните договори,“ изјави Мартин Владимирoв, директор на Програмата за енергија и клима при Центарот за проучување на демократијата во Софија.
Мерки на бугарската влада
Бугарија, која планира да го воведе еврото на 1 јануари 2026 година, веќе презеде чекори за обезбедување на стабилно снабдување со гориво.
Владата воведe привремена забрана за извоз на дизел и авионско гориво кон земјите на ЕУ и донесе закон кој овозможува државна контрола врз рафинеријата во Бургас — со можност за продажба на нов сопственик за да се избегнат последиците од санкциите.
Оваа недела инспекции и засилени безбедносни мерки се спроведени во рафинеријата, што властите го оценија како клучен чекор за заштита на националната енергетска инфраструктура, пренесува Reuters.
