„Meta“, компанијата која стои зад „Facebook“ и „Instagram“, објави дека популарната функција на „Instagram“ наречена „broadcast channels“ наскоро ќе биде достапна на „Facebook“ и „Messenger“.
Оваа алатка им овозможува на креаторите и јавните личности со страници на „Facebook“ да испраќаат пораки, вклучувајќи фотографии, видеа и гласовни белешки, до нивната онлајн заедница.
Тоа сепак ќе биде еднонасочна алатка за комуникација, што значи дека само администраторите на страницата можат да објавуваат пораки на каналот. Сепак, учесниците можат да реагираат на нив и да гласаат на анкети.
Администраторот на страницата може да започне канал директно од нивната страница, а „Facebook“ ќе им даде на нивните следбеници еднократно известување да се приклучат откако ќе ја испратат првата порака. Врз основа на сликите од екранот споделени од извршниот директор на „Meta“, Марк Цукерберг, „broadcast channels“ ќе се појавуваат во разговорите на корисниците на „Messenger“ под табот соодветно означен како „Сhannels“. Учесниците ќе добиваат известувања секогаш кога сопственикот на страницата ќе испрати ажурирање, но тие можат да го исклучат каналот во секое време.
Според најавата на „Meta“, секој администратор на страницата на која функцијата сега е достапна може да започне канал доколку сака. Оваа функција сè уште не е достапна насекаде, а оние кои не можат да ја најдат опцијата за отворање „broadcast channels“ засега можат да се пријават на листата на чекање.
Се очекува оваа проширена функционалност дополнително да ја зајакне позицијата на „Meta“ во дигиталниот простор, но и да отвори нови можности за креаторите на содржини на повеќе платформи.
Извор: telegraf.rs
