Во периодот од 03 до 09 февруари, во земјава се пријавени 2.880 случаи на заболени од грип и заболувања слични на грипот, се вели во извештајот на Институтот за Јавно здравје.
„Бројот на пријавени лица оваа недела споредено со 6-та недела од минатата сезона е
зголемен за 53,6%, а во споредба со бројот заболени изминативе 14 сезони зголемен е за 11,4% . Во однос на возрасната дистрибуција, 1.552 лица се на возраст од 15-64 години, 685 се деца на
возраст од 5-14 години, 371 деца на возраст од 0-4 години и 272 се регистрирани болни се кај лица на возраст над 65 години. Највисока инциденца се регистрира кај децата на возраст од
0-4 години, а кај децата од 5-14 години инциденцата изнесува 318,9/100.00„ се вели во извештајот на ИЈЗ.
Најмногу заболените се пријавени во Скопје – 692, Струмица – 333, Битола – 304, Свети Николе –
158, Охрид – 141, Велес – 140, Радовиш – 122, Кавадарци – 109 и Куманово – 109.
Во сезоната 2024/2025 вкупниот број на случаи на грип и заболувања слични на грип изнесува 11.614. Во споредба со истиот период од минатата сезона, бројот на пријавени случаи е зголемен
за 10,2%, а во однос на моделот од последните 14 сезони се регистрира зголемување од
11,8%. Во октомври бројот на заболени бил 195 случаи или 1,7%, во ноември – 259 случаи или 2,2%, декември – 570 случаи или 4,9%, јануари – 7.710 случаи или 66,4% и во февруари (заклучно со 09.02.2025) – 2.880 случаи или 24,8%
Во досегашниот тек на сезоната на грип, регистрирани се две починати лица асоцирани со грип
„Се забележува зголемување на бројот на заболувања слични на грип, кој е над неделната граница
за средна активност. Резултатите добиени од вирусолошкиот надзор над инфлуенца покажуваат дека има широка географска активност на вирусот на грип. Процентот на позитивност е над границата од 10% пет недели со ред. Согласно достапните податоци, Р.С. Македонија има висок интензитет на вирусот на грип“ се вели во соопштението на ИЈЗ.
Општите мерки за заштита од грип се насочени кон сите акутни респираторни заболувања и може да се од голема корист, особено ако се применуваат во текот на целиот зимски период:
Па така треба да се избегнува собирање и престој во простории каде престојуваат повеќе луѓе, особено да се избегнува близок контакт со луѓе кои се болни или сомнителни – кашлаат, киваат, имаат покачена телесна температура. Често да се мијат рацете со вода и сапун или дезинфекционо средство. Да се загреваат просториите за престој и често да се проветруваат. Препорачливо е топло, слоевито облекување, топли бањи. Да се пијат топли напитоци (чаеви и супи), овошни цедени сокови, вода со лимон. Да се земаат свежи продукти богати со витамини и минерали, најдобро овошје и зеленчук кои му се неопходни на организмот. Особено се пожелни продукти богати со витамин Ц (цитрони, лимони, портокали). Може да се користат и мултивитамински напитоци и препарати. Практикување здрав начин на живот и навики, вклучително добар сон и одмор, здрава храна, одржувајте физичка и психичка активност, намалете го стресот.
Силниот имунитет ќе ви помогне да останете здрави или полесно да се справите со грипот и
заболувањата слични на грип. Сепак, дури и да сте совршено здрави и да имате силен имунитет,
може да заболите од грип или заболување слично на грип.
Што доколку се разболите од грип?
Следете ги следните препораки на ИЈЗ: „Останете дома и не одете на работа, во училиште или на места каде има многу луѓе. Одморајте се и земајте многу течности и лесна храна. Избегнувајте блиски контакти со лицата со кои живеете, не примајте посети додека сте болни. Покријте го носот и устата со шамивче при кашлање и кивање. По употреба, фрлете ги во корпа за отпадоци. Носете заштитна маска кога контактирате со своите блиски во домот, кога кашлате и кивате. Практикувајте често и темелно миење на раце со топла вода и сапун. Користете влажни марамчиња кои содржат алкохол или средство за дезинфекција на рацете. Избегнувајте допирање на очите, носот и устата со раце.Често проветрувајте ја просторијата каде престојувате додека сте болни. Одржувајте ја чиста вашата околина – предмети, површини со средства за хигиена на домот. Ако сте над 65 години или имате хронични заболувања, или доколку симптомите на болеста се влошуваат или траат повеќе денови – побарајте лекарска помош.“
